Bıiktigi 8-9 metr bolatyn aǵashqa 6 adamnyń qushaǵy ázer jetedi
Túrkistan oblysynda 1000 jyldyq tut aǵashy búr jardy. Alty adamnyń qushaǵy áreń jetetin aǵashtyń túbi qýrap ketkenimen, tóbesindegi butalary japyraq ashyp, kógerip tur, dep habarlaıdy Almaty-akshamy.kz QazAqparatqa silteme jasap.
1000 jyldyq tut aǵashy Túrkistan qalasynan 30 shaqyrym jerdegi Qarnaq aýylynda ornalasqan.
Jergilikti turǵyndar ony májarat tut dep ataıdy. Bıiktigi 8-9 metr bolatyn aǵashqa 6 adamnyń qushaǵy ázer jetedi.
«Jalpy bul aǵash týraly birneshe ańyz-ápsana bar. Sonyń birinde Vİİİ ǵasyrda ıslam dinin Orta Azıa elderine taratýǵa kelgen arab qolbasshysy Kýteıba ıbn Mýslım otyrǵyzǵany aıtylady. Al, ekinshi nusqada Imam Bahlı esimdi dindar kisi jylqy baılaý úshin, jerge qaqqan degen aǵash kógerip, ósip shyqqan degen derek bar. Al, keı ápsanalarda Paıǵambarymyzdyń (s.ǵ.s.) sahabalary osy mańnan ótkende bulaq basyna tirep qoıǵan asa taıaǵy qalyp ketken desedi», - deıdi shyraqshy Abdýlatıp Smaılov.
Qazir aǵashtyń túbiri qýrap ketse de, shybyqtary kógerip, japyraq ashyp tur.
Al, ortasy úshke bólingen. Aýyr tartqan bólikterin turǵyndar arnaıy aǵashtarmen tirep qoıypty.
Sońǵy kezde alyp aǵashty arnaıy kórý úshin elimizdiń túkpir-túkpirinen arnaıy keletinder kóbeıgen.
Tipti shet elden kelip jatqandar da bar eken. Barshasy tut aǵashynyń basynda quran oqyp, tilek tileıdi.
Abdýlatıp Smaılovtyń aıtýynsha, aýylda mundaı tarıhı eki tut aǵashy bolǵan eken. Bireýin aýyl balalary oınap júrip, órtep jiberipti.
Al, ekinshisin jergilikti turǵyndar qamqorlyqqa alyp, qorshap qoıǵan. Arnaıy qudyq qazyp, aryq tartqan.
«Kóptegen jyldar boıy sýarylmaı qaldy. Sodan qýrap ketken bolatyn. Qazir sý kelip tur. Jıi-jıi sýaryp turamyz. Búr jaryp, kók ala bastaǵan kórip, qýanyp júrmiz. Bul da bir jaqsylyqtyń nyshany bolar» - deıdi ol.