Túrkistan oblysynda dárigerler 1 jasar balanyń qolyn bilegine deıin kesip alyp tastaýǵa májbúr boldy. Abaısyzda oń qolyn ettartqyshqa salyp alǵan bala esinen tanyp qalǵan. Dárigerler balanyń qazirgi jaǵdaıy ortasha, birqalypty aýyr deıdi, - dep habarlaıdy Aqshamnews.kz tilshisi Otyrar.kz-ke silteme jasap.
Túrkistan oblysy Tóle bı aýdany Kóksáıek aýylynda bir jasar oıyn balasynyń oń qoly ettartqyshqa túsip, shaınap ketken. Dárigerler onyń bir ólimnen aman qalǵanyn aıtady. Oqıǵa 7 qyrkúıekte bolǵan. Es-tússiz, kóp qan joǵaltqan balany oblystyq balalar aýrýhanasyna túske jaqyn jedel járdemmen ata-anasy jetkizgen.
"Úıinde ata-anasy banki jaýyp jatqan kezde bala qolyn ettartqyshqa tyǵyp alyp, shaınap ketken. Tolyq kólemde. Kúndizgi kezekshilikte alyp keldi. Biz jedel túrde jansaqtaý bólimine jatqyzyp, ol jerde jedel túrde ota jasap, balaǵa kómek kórsettik. Qolyn tómengi bilek deıdi, sol jerge deıin shaınap ketken. Saýsaqtary men alaqan súıekteriniń barlyǵyn maıdalap shaınap tastaǵan. Qolyn saqtap qalýǵa múmkindik bolmady. Qoly jańaǵy ettartqyshta maıdalap, termen ǵana ilinip turdy", - deıdi dáriger-travmatolog Erjan Sháripov.
Dárigerlerdiń aıtýynsha, bala jansaqtaý bóliminen shyǵarylǵanymen jaǵdaıy qalypty ortasha aýyr. Ota kezinde balanyń oń qolyn bilegine deıin kesip alyp tastaýǵa májbúr bolǵan. Dárigerlerge tótenshelikter kómektesken. Áýeli mamandar balanyń qolyn ettartqyshtan shyǵaryp alǵan.
"Tótenshe jaǵdaılar departamenti qyzmetkerleri oblystyq balalar klınıkalyq aýrýhanasynda balanyń qolyn ettartqyshtan bosatý boıynsha biregeı operasıa júrgizdi. 112 nómirine bir jarym jasar balanyń qolyn elektr ettartqyshqa suǵyp alǵany týraly habarlama kelip túsken. Dárigerler balany óz kúshterimen bosata almaǵan soń, qutqarýshylardyń kómegine júginýge májbúr boldy. Operasıa dárigerlermen birlesip júrgizildi. Balaǵa narkoz berilgennen keıin qutqarýshylar apattyq-qutqarý quralyn paıdalanyp, ettartqyshtyń korpýsyn muqıat kesip, onyń qolyn bosatty", - dedi Shymkent qalalyq tótenshe jaǵdaılar departamentiniń baspasóz qyzmeti ókilderi.
Qazir bala esin biledi, sóıleı alady. Oǵan ata-anasy qarap jatyr. Balasynyń jaǵdaıynan eseńgirep qalǵan ata-ana oqıǵa týraly qandaı da bir pikir berýden bas tartty. Qutqarýshylar men dárigerler ata-analarǵa barynsha muqıat ári saq bolýǵa, balany jalǵyz qaraýsyz qaldyrmaýǵa shaqyrady.