Jańa qoǵamdyq keńistik Jas Qanat shaǵynaýdanynda "Halyq qatysatyn búdjet" baǵdarlamasy aıasynda abattandyryldy.
Joba aıasynda jol-asfalt jabyny tóseldi, aýmaq kógaldandyryldy, jaryq baǵanalary, sándik pishinder, oryndyqtar, qoqys jáshikteri qoıyldy.
Sonymen qatar jańa aıaldama kesheni jasaldy, qaýipsizdik maqsatynda demalys aımaǵynyń aınalasyna beınekameralar ornatyldy.
Aıta keteıik, bıyl Túrksib aýdanynda "Halyq qatysatyn búdjet" baǵdarlamasy boıynsha 32 joba júzege asyryldy.
Eske salsaq, búginde Almatydaǵy aýdandardyń aýmaǵyn abattandyrý jáne damytý boıynsha ótinim qabyldanyp jatyr, ol 30 qyrkúıekke deıin jalǵasady. Saraptamalyq keńesterdiń baǵalaýynan ótken jáne kóp daýys jınaǵan jobalardy aýdan ákimdikteri 2026 jyly júzege asyrady.
Qala turǵyndary usynystaryn budget.open-almaty.kz. ınternet-portaly arqyly jibere alady. Túsken ótinimderde jobalyq usynystyń ataýy men sıpattamasy, ornalasqan jerdiń mekenjaıy, boljamdy fotosýreti nemese eskızi jáne smetasy kórsetilýge tıis.
"Halyq qatysatyn búdjet" jónindegi keńesti nemese qajetti aqparatty Almatynyń aýdan ákimdikterinen, sondaı-aq Almaty qalasy ákimdiginiń Open Almaty qoǵamdyq qabyldaýynan 224 39 29 (ishki 203) telefony arqyly alýǵa bolady.