Almaty qalalyq máslıhatynyń XXXIX sessıyasynda megapolıstíń 2026–2030 jyldarǵa arnalǵan Damu josparynyń jobasy tanystyryldy. Ekonomıka jáne qarjy basqarmasynyń basshysy Bauyrjan Qūdaıbergenov negízgí baǵyttar turaly bayandama jasap, aldaǵy bes jyl arnalǵan qalany damytu men jańǵyrtuǵa qatysty basym baǵyttardy atap óttí.
Damu jospary tūraqty ekonomıkalyq ósím, kólík júıesín keshendí damytu, qolaıly qalalyq orta qalyptastyru, áleumettík tūraqtylyq pen ornyqtylyq, ekologıyalyq ómír sapasy, tsıfrlyq transformatsıya jáne qala qauípsízdígín qamtamasyz etu syndy jetí negízgí basymdyqty qamtıdy.
Bauyrjan Qūdaıbergenovtyń aıtuynsha, 2030 jylǵa qaraı qalanyń JÓÓ kólemín ekí esege ūlǵaıtu, ınvestıtsıya kólemín 7 trln teńgege jetkízu jáne shaǵyn jáne orta bıznestíń úlesín 65%-ǵa deıín arttyru josparlanǵan. Shaǵyn jáne orta bıznestíń damuymen qatar turızmdí jetíldíruge, ındustrıyalyq aımaqty keńeıtuge jáne megapolıstíń ınvestıtsıyalyq tartymdylyǵyn arttyruǵa erekshe kóńíl bólínedí. Jospar ayasynda Almaty tau klasterín damytu jónínde auqymdy sharalar qamtylǵan: 350 km tau soqpaǵyn kórkeıtu, aspaly joldar jelísín keńeıtu, tau-shańǵy ınfraqūrylymynyń qabyldau quatyn 5 esege arttyru kózdelgen. 2030 jylǵa qaraı qalada 7 myń nómírge arnalǵan 60 ornalastyru nysany salynady.
Kólík blogy qala joldaryn magıstraldyq logıstıkalyq dálízdermen bíríktírudí, metro jelísín keńeıtudí, LRT jelísín íske qosudy, 42 BRT dálízín qūrudy jáne 100 km-den astam jańa jol saludy qamtıdy. Būl sharalar qoǵamdyq kólíktíń kúndelíktí jolaushylar sanyn 3 mln saparǵa deıín jetkízuge múmkíndík beredí.
Ekonomıkanyń áleuetín arttyrumen qatar, jaıly qalalyq orta qalyptastyru jalǵasady. Almaty polıtsentrlík damu modelíne kóshedí. Tarıhı ortalyqtyń júktemesín azaıtu úshín jańa tartylys núktelerí paıda bolady. 38 qoǵamdyq keńístíktí salu jáne jańartu, 68 qala kóshesín jańǵyrtu josparlanǵan. 2026 jyldyń sońyna deıín qala tūrǵyndary tolyqtaı ortalyqtandyrylǵan sumen qamtylady.
Áleumettík blok 130-dan astam nysandy salu jáne jańǵyrtudy qamtıdy. Būl jańa mektepter men balabaqshalar, medıtsına ūıymdary, statsıonarlardy jańǵyrtu, mádenı nysandardy jańartu jáne sport ınfraqūrylymyn damytu qarastyrylǵan.
Ekologıyalyq bastamalar ayasynda keń kólemdí kógaldandyru, suaru júıesín engízu, jylu kózderínen shyǵatyn zıyandy zattardy 13 esege azaıtu jáne qoǵamdyq kólíktíń tolyq ekologıyalyq qauípsízdígín qamtamasyz etu kózdelgen.
Tsıfrlandyru salasynda ınjenerlík jelílerdíń júktemesín ońtaılandyru men boljau úshín «qalanyń tsıfrlyq egízí» jasalady. Sondaı-aq, zıyatkerlík basqaru júıesí engízílíp, kólíktíń qozǵalys uaqyty men auaǵa bólínetín zıyandy shyǵaryndylar azayady.
Qala tūrǵyndary men qonaqtarynyń qauípsízdígín arttyru maqsatynda jańa formattaǵy 20 uchaskelík polıtsıya punktí ashylady, 400 áleumettík, 200 tūrǵyn jáne 150 ınfraqūrylymdyq nysan seısmıkalyq jaǵynan kúsheıtíledí, 20 órt deposy salynyp, jańǵyrtylady.
Ūsynylǵan Damu jospary Almatynyń zamanauı megapolıske aınaluyna strategıyalyq baǵyt beríp, qalanyń ekonomıkalyq áleuetín arttyruǵa, tūrǵyndar ómíríníń sapasyn jaqsartuǵa, jaıly qalalyq ortany qalyptastyruǵa jáne ekologıyalyq ornyqtylyqty qamtamasyz etuge baǵyttalǵan.