Almaty qalasy máslıhatynda ótken sesıada Qoǵamdyq densaýlyq saqtaý basqarmasy basshysynyń orynbasary Laıla Imanǵalıeva jergilikti búdjet esebinen tegin beriletin dáriler men medısınalyq buıymdar tizimindegi ózgeristerdi tanystyrdy, dep habarlaıdy aqshamnews.kz
Formýlárlyq komısıa úsh jańa preparatty engizýdi usyndy:
Anıfrolýmab – júıeli qyzyl jegi dıagnozy bar naýqastarǵa. Buryn qoldanylǵan belımýmab jetkizilmeı qalǵandyqtan, ony anıfrolýmabpen almastyrý josparlanyp otyr. Bul jańa býyn bıologıalyq dári aýrýdyń belsendiligin tómendetip, asqyný qaýpin azaıtady.
Tedýglýtıd – qysqa ishek sındromy bar bir balaǵa. Jylyna 372 flakon qajet. Dári ishektiń sińirý qabiletin jaqsartyp, parenteraldy (tamyr arqyly) qorektenýge táýeldilikti azaıtady.
Rıtýksımab – Devık aýrýy (optıkonevromıelıt) dıagnozy bar bir naýqasqa. Bul dári aýyr aýtoımmýndy qabynýdy basyp, kórý qabiletin joǵaltý qaýpin tómendetedi.
Tizimnen alynyp tastalatyn dáriler men buıymdar
Endoprotez – osteoartroz dıagnozy orfandyq aýrýlar tiziminde joq bolǵandyqtan.
Belımýmab – jetkizýshiler bolmaǵandyqtan satyp alynbady. Onyń ornyna anıfrolýmab engiziledi.
Rıvaroksaban – júrekshe fıbrıllásıasy men trepetinde qoldanylatyn dári. Ol Densaýlyq saqtaý mınıstrliginiń ambýlatorlyq tegin dáriler tizimine engizilgendikten, basqarma jelisi boıynsha satyp alynbaıdy.
Eplerenon (eki dozada) – dılatasıalyq kardıomıopatıaǵa arnalǵan, sońǵy úsh jylda satyp alynbaǵan.
Qarjylyq tıimdilik
Máslıhat depýtaty Aıgúl Shalbaeva jańa dárilerdiń búdjetke áserin surady. Laıla Imanǵalıeva anıfrolýmabtyń baǵasy belımýmabqa shamalas ekenin, qarajat jyl saıyn josparlanǵanyn, al belımýmab 2025 jyly jetkizilmegendikten, anıfrolýmab klınıkalyq turǵydan da, ekonomıkalyq jaǵynan da tıimdi balama ekenin aıtty.