Qazaqstanda stomatologıalyq qyzmetterge zeınetaqy jınaǵy arqyly tóleý úshin ótinim qabyldaý toqtatylady. Shekteý 15 qyrkúıekten bastap kúshine enedi, - dep habarlaıdy Aqshamnews.kz.
"15 qyrkúıeken bastap enpf-otbasy.kz platformasynda tis emdeýge zeınetaqy jınaǵynan artylǵan qarajatty paıdalaný týraly ótinim qabyldanbaıdy. Bul kúnge deıin berilgen ótinishter ádettegi tártippen qaralady", – delingen "Otbasy bankiniń" habarlamasynda.
Bank málimetinshe, zeınetaqy jınaǵyn stomatologıalyq qyzmetterge paıdalaný jónindegi ótinimderdi qabyldaý qashan qaıta bastalatyny týraly aqparat qosymsha jarıalanady.
Eske salaıyq, buǵan deıin Qarjy monıtorıńi agenttiginiń tóraǵasy Janat Elımanov Prezıdent Qasym-Jomart Toqaevqa zeınetaqy jınaqtaryn zańsyz qolma-qol aqshaǵa aınaldyrý derekteri týraly baıandaǵan edi. QMA stomatologıalyq qyzmetter jeleýimen 200 mıllıard teńgeniń negizsiz ENPF-ten alynǵanyn anyqtady. Qarajat jalǵan sqemalar arqyly shyǵarylǵan, oǵan jeke klınıkalar tartylǵan.