Almaty máslıhatynyń kezekten tys sessıyasynda orfandyq patologıyasy bar tūrǵyndardy dárímen qamtamasyz etu maqsatynda aurular men dárílík preparattar tízímín keńeıtu turaly sheshím qoldau tapty. Būl jaıt sońǵy jyldary mūndaı jaǵdaıdyń kúrt artuyna baılanysty qaralyp otyr.
Almaty qalasynyń Qoǵamdyq densaulyq saqtau basqarmasyn uaqytsha basqaratyn Láılá Imanǵalıeva būl úderístíń būryn-sońdy bolmaǵan qarqynmen ósíp otyrǵanyn atap óttí:
«2017 jyly sırek dıagnozy bar nebárí 140 patsıent bolsa, búgínde olardyń sany 4 287-ge jettí».
Sondyqtan tírshílík úshín mańyzdy preparattar tízímín keńeıtu – jaı ǵana qoldau sharasy emes, zamanauı dárílerge mūqtaj tūrǵyndardyń ómír sapasyn saqtau úshín mańyzdy qadam bolyp otyr.
«Kóp jaǵdaıda būl – aurudy baqylap, eńbekke qabílettílíktí saqtaudyń árí múgedektíkke ákeletín asqynulardyń aldyn aludyń jalǵyz joly», – dedí Láılá Imanǵalıeva.
Qabyldanǵan sheshímníń mańyzdy tūsy – tízímge engízílgen árbír preparat naqty patsıentterdíń medıtsınalyq qajettílígíne negízdelgen.
«Árbír sannyń artynda qıyn jaǵdaıda qalǵan naqty adamdar men olardyń otbasylary tūr. Bíz olardy emdeuge qoljetímdílíkpen qamtamasyz etuímíz kerek», – dedí basqarma ókílí.
Qoldau sharalary auyr autoımmundyq, nevrologıyalyq jáne gastroenterologıyalyq dıagnozy bar qala tūrǵyndaryn da qamtıdy. Būl sanattaǵy patsıentterge jańa buyndaǵy ınnovatsıyalyq dáríler qajet.
Deputattar maqūldaǵan qarjylandyrudyń negízgí maqsaty – densaulyǵy qymbat árí qoljetímdílígí kúrdelí preparattarǵa tíkeleı táueldí nauqastardy tūraqty dárílík terapıyamen qamtamasyz etu.
Láılá Imanǵalıevanyń aıtuynsha, būl sheshím kóru qabíletíníń joǵaluyn, auyr nevrologıyalyq asqynulardy, júıelí aurulardyń órshuín, sondaı-aq sırek patologıyasy bar balalarda tūraqty parenteraldy qorektenu qajettílígín boldyrmauǵa múmkíndík beredí. Qabyldanǵan sharalar megapolıste emdí úzdíksíz júrgízuge jáne áleumettík qoldau júıesín odan árí nyǵaıtuǵa jaǵdaı jasaıdy.