TikTok jelísínde keń tarap jatqan TYLA esímdí ártístíń ánín estígen bolarsyz? Áleumettík jelíní asha qalsań, myń būrala bılep jatqan jastardy kóresíń. Típtí án avtorynyń ózí de trend bolyp taralǵan bıge beıne túsíríp, baǵalap jatyr. Al dál osy álem bılep jatqan trendtíń avtory qazaq qyzy desem senesíz be? 21 jastaǵy qaraǵandylyq aru mıllıondaǵan jūrttyń súıíktí bıíne aınalǵan trendí taratty. Aqshamnews.kz tílshísí onymen tíldesíp, áńgíme tarqatty.
Qaraǵandydan shyqqan qarshadaı qyz qalaı álemdí "bılettí"?
Albına Ospanova - Qaraǵandy qalasynyń tumasy. Ol jastaıynan shyǵarmashylyqqa qyzyǵyp, ónerden shabyt alyp ósken qyz.
"Es bílgelí bımen aınalysamyn. Ónerdí, shyǵarmashylyqty súıemín", – deıdí ol.
Qazír Albına bı úıretíp, óz horeografıyalaryn qoıyp, áleumettík jelíge kontent túsíredí. Búgínde ol nazaryn bı óneríne būryp, trend kontent jasauǵa jáne jeke jobalaryn damytuǵa den qoıǵan.
Sonymen qatar, ol model retínde Bacca Models agenttígímen jūmys ísteıdí. Típtí modeldík kelísímshart boıynsha Koreyada da bolyp qaıtqan. Muzyka, óner, moda álemín jítí qadaǵalap, túrlí elderdíń mádenıetí men tílín zertteuge qyzyǵady.
"Bírneshe mınut íshínde qoıylǵan bı edí"
TYLA áníne túsírílgen trendtíń tarıhy tosynnan tuǵan. Būl turaly Albına bylaısha áńgímeledí.
"Būl trend múlde josparsyz tudy. TikTok-ty qarap otyrǵanda TYLA-nyń álí tolyq shyqpaǵan jańa áníníń úzíndísí kezdese kettí. Áuendí tyńdap otyryp, bıtke jaqsy túsetín qımyl qosqym keldí. Shamamen bírneshe mınut íshínde qozǵalystardy oılap tauyp, vıdeony túsírdím de, eshteńe oılamaı júktep jíberdím", – deıdí Albına.
Osylaısha "oıda jaqta tuǵan trend" az uaqyt íshínde túrlí elge tarap, vırusqa aınalady.
TYLA men onyń komandasy qalaı baıqady?
Alǵashynda Albına eshqandaı ǵalamdyq effekt kútpegen.
"Shynymdy aıtsam, būl trend osylaı búkíl álemge jaıylady dep oılaǵan joqpyn. Alǵashqy belgíler shyqqanda “míne, maksımum osy shyǵar” dep oıladym. Bíraq bírneshe kúnnen keıín túrlí elderden, túrlí tanymal bıshíler men aıdoldardan vıdeolar shyǵa bastady. Būl men úshín bír shetínen óte jaǵymdy áser qaldyryp, bír shetínen qatty tolqytty", – deıdí Albına.
Talaıdy tańǵaltqan trend TYLA-nyń ózín de, komandasyn da aınalyp ótpedí. Ártístíń ózí de vıdeolardy kóríp, belgílep, laık basqan. Típtí qazír ol kontsertterínde Albına shyǵarǵan bıdí bılep júr.
"Olar meníń vıdeomdy kórdí, múmkín esínde de saqtap qalǵan shyǵar. Komandasynyń trendtí baıqap, reaktsıya bíldíruí - meníń shyǵarmashylyǵym úshín úlken jetístík", – deıdí ol.
Eń úlken quanysh – jaqyndarynyń reaktsıyasy.
"Barlyǵy men úshín shyn quandy. Otbasym mení maqtan tūtyp, al dostarym menímen bírge otyryp alyp monıtorıng jasap, “qaı aıdoldar seníń trendíńdí bılep jatyr eken?” dep bírge qarap otyrdy. Árqashan qoldap, bírge quanǵandary úshín olarǵa óte rızamyn", – deıdí ol.
Albınanyń armany ne?
Albınanyń endígí maqsaty – ózín bı ındustrıyasynda álemdík deńgeıde tanytu.
"Tanymal ártístermen, írí kompanıyalarmen jūmys ístegím keledí. Kóbírek horeografıya, trend oılap tauyp, álemdík komyunıtı íshínde aty bar, stılí men vaıby bírden tanylatyn adam bolsam deımín", – deıdí ol.
Sonymen qatar, ol ózín kontent jasaushy retínde de damytudy kózdeıdí: bıler, vlogtar, shabyt beretín jobalar túsírgísí keledí.
"Qysqasy, shyǵarmashylyǵymdy kórsetíp, ózímdí damytuǵa múmkíndík beretín kez kelgen ūsynystan qashpaımyn. Kóbírek el kórgím keledí, tíl úırengím keledí, bı arqyly álemmen tíldeskím keledí", – deıdí Albına.