Almatyda ınjenerlik-kommýnıkasıalyq ınfraqurylymdy keń aýqymda jańartý júrip jatyr. Bul jumys aıasynda jylý, elektr, sý qubyry jáne káriz júıelerin qaıta qurý, sondaı-aq strategıalyq mańyzy bar sýqabyldaǵyshtar salý jobalary qolǵa alynǵan. Bul týraly qala ákiminiń orynbasary Almasqan Smatlaev Óńirlik komýnıkasıalar qyzmetinde ótken brıfıńte málimdep, 2025 jylǵy nátıjeler qala júıeleriniń turaqtylyǵyn arttyrýda jáne qys maýsymyna daıyndyqta sheshýshi ról atqarǵanyn jetkizdi.
Almasqan Smatlaevtyń aıtýynsha, bıyl 39 shaqyrym jylý jelisi men 17 qazandyq jańǵyrtyldy. Sonyń arqasynda jylý jelileriniń tozý deńgeıi 56,1%-dan 54,3%-ǵa, al qazandyqtardyń tozýy 65,1%-dan 62,1%-ǵa tómendedi. Elektr jelilerin jańartý da qarqyn alǵan: 221 shaqyrym jeli aýystyrylǵan, jyl sońyna deıin bul kórsetkish 238 shaqyrymǵa jetýge tıis.
Sýmen jabdyqtaý júıesin jańartý da qolǵa alynǵan: 330,7 shaqyrym jańa sý qubyry salyndy, 60 shaqyrym jeli jańǵyrtyldy. Sonyń nátıjesinde sý qubyrlarynyń tozý deńgeıi 53,8%-dan 51%-ǵa tómendedi. Al káriz júıesinde 306,4 shaqyrym jeli salyndy, 5,5 shaqyrym qubyr jańǵyrtyldy, bul tozý kórsetkishin 49,5%-ǵa deıin azaıtýǵa múmkindik berdi.
Ákim orynbasary jańa sýqabyldaý nysandarynyń qurylysyna erekshe toqtaldy. Onyń aıtýynsha, "Aqsaı" sýqabyldaǵyshy 95%-ǵa daıyn jáne ol qalanyń batys jáne taýǵa jaqyn aımaqtaryndaǵy 140 myńǵa jýyq turǵyndy sýmen qamtamasyz etedi. Nysan 2026 jyly mamyrda, tasqyn kezeńinen keıingi synaq-retteý jumystarynan soń iske qosylady. "Ermensaı" sýqabyldaǵyshy 2026 jyldyń qarashasynda aıaqtalyp, Bostandyq aýdanynyń ońtústik-shyǵys bóligine sý beredi.
Apattyq jaǵdaılar týraly aıtty kele, Smatlaev 13 qarasha kúni Alataý aýdanynda bolǵan iri elektr apatyn mysalǵa keltirdi: gaz qubyryn tartý kezinde merdiger 110 kV kabelin zaqymdap, 32 myńnan astam tutynýshy jaryqsyz qalǵan. Degenmen, apat bir táýliktiń ishinde tolyq joıylǵan. Keltirilgen 64 mln teńge shyǵyn tolyq kólemde kináli kompanıaǵa júkteldi.
Ákimniń orynbasary merdigerlerge qoıylatyn talaptardyń kúsheıgenin atap ótti: birneshe kompanıa lısenzıasynan aıyryldy, 30-dan astam sot talap-aryzy ázirlendi, al barlyq tehnıkalyq kelisim endi tıisti basqarmalarmen birlesip qana júrgiziledi.
"Biz jumysty sapaly ári ýaqytynda oryndaýǵa qabiletti, tájirıbeli de tártipti merdigerlerdi qalyptastyryp jatyrmyz. Almatynyń ınfraqurylymy senimdi bolýǵa tıis jáne ondaǵan jylǵa eseptelýi kerek", — dedi Almasqan Smatlaev.