Almatyda qysqy qauípsízdíktí qamtamasyz etu sharalary kúsheıtíldí: arnaıy tehnıkalar parkí rekordtyq 1030 bírlíkke deıín ūlǵaıtyldy, kóshe tazalauǵa 2700-den astam jūmysshy jūmyldyryldy, zamanauı qar erítetín punktter íske qosylyp jatyr, al "Almaty Tazalyq" alǵash ret táulík boıy jūmys ísteıtín úsh auysymdyq júıege óttí. Būl turaly qala ákímíníń orynbasary Almashan Smatlaev Óńírlík kommunıkatsıyalar qyzmetíndegí brıfıngte aıtty.
Almatyda alǵashqy qar 4-5 qarashada jaudy jáne sońǵy jyldardaǵy eń qalyń qar boldy: tauly aımaqta qardyń qalyńdyǵy 50 santımetrden asty, qala íshínde shamamen 20 santımetrge jettí. Kúnníń kúrt suytuyna jáne qardyń kóp jauǵanyna qaramastan, kommunaldyq qyzmet magıstraldar men aula aumaqtaryndaǵy qardy tezdetíp kúredí. 3 myń tekshe metrden astam qar shyǵarylyp, 1,5 myń tonnadan astam kóktaıǵaqqa qarsy materıaldar paıdalanyldy.
Ákím orynbasarynyń aıtuynsha, bıyl alǵash ret qar erítetín stantsıyalar íske qosyla bastady. Áuezov audany aumaǵyndaǵy alǵashqy punkt táulígíne 1200 tekshe metr qar eríte alady. Ekínshí beket Bostandyq audanynda jyl sońyna deıín kanadalyq tehnologıya negízínde íske qosylyp, táulígíne 4 myń tekshe metrge deıín qar erítedí. 2026 jyly Medeu jáne Almaly audandarynda taǵy ekí keshen ashylady.
"Almaty Tazalyq" úshín bıylǵy jyl erekshe mańyzdy boldy: kásíporyn qyzmetkerleríníń sany 1560 adamnan 3169 adamǵa deıín kóbeıdí, al jol salasyndaǵy jūmysshylar 638 adamnan 2000 adamǵa deıín artty. Tehnıkalar parkí alǵash ret myń bírlíkten asyp, 330 jańa tehnıka satyp alyndy. Jūmys kestesíníń úsh auysymǵa kóshuí túngí jáne erte tańǵy tazartu jūmystaryn júıelí júrgízuge múmkíndík berdí.
Būǵan qosa, qyzmetkerlerge arnalǵan jaǵdaı jaqsardy: moduldík punktter salyndy, bazalar jańartyldy, 112 oryndyq jataqhana bólíndí jáne kásíporynnyń jańa tūrǵyn qorynan qosymsha 262 oryn qarastyryldy.
"Bíz aua raıyna táueldí emespíz. Qar qaı uaqytta jausa da, qala daıyn tūruy kerek. Qazír jedel áreket etu júıesí táulík boıy jūmys ísteıdí, al jańa qar erítetín punktter kóshelerdí tazartu jūmysyn aıtarlyqtaı jedeldetedí", – dedí Almashan Smatlaev.
Sondaı-aq, ol kelesí jyldan bastap qalada "Bír audan – bír merdíger" modelí engízíletínín, būl audandyq kóshelerdí tazalaudyń sapasy men jauapkershílígín kúsheıtetínín atap óttí.
