Erekshe bír jylulyqqa toly, júrekterge kúsh-quat syılaǵan mádenı shara óttí. «Qazaq soqyrlar qoǵamy» qoǵamdyq bírlestígíníń Almaty qalalyq fılıaly jáne Almaty qalasy Jūmyspen qamtu jáne áleumettík baǵdarlamalar basqarmasynyń ūıymdastyruymen ótken «Men sení súıem, Ómír!» atty qalalyq án baıqauy - múmkíndígí shekteulí jandarǵa arnalǵan merekelík kontsert qana emes, ómírge degen qūshtarlyqtyń, ruhanı kúshtíń, adam janyndaǵy sheksíz múmkíndíktíń aıqyn kórínísí boldy.
Bıylǵy baıqau «Halyqaralyq múgedekter kúní» men «Halyqaralyq kóz múgedekterí kúníne» oraı ūıymdastyryldy. Maqsat - zaǵıp jáne nashar kóretín jandarǵa óz ónerín kórsetuge múmkíndík beru, qoǵam nazaryn olar jasaı alatyn ísterge būru, sondaı-aq ınklyuzıvtí mádenıettí damytu. Óner – olar úshín tek hobbı emes, ómírdíń ózí. Shara bastalmaı jatyp-aq zal íshínde erekshe tolqu sezíldí. Jınalǵan qonaqtar men qala tūrǵyndary sahnaǵa shyǵady dep kútílgen ónerpazdardyń quanyshyn bólísuge asyqqandaı. Al sahna syrtynda óz kezegín kútíp tūrǵan qatysushylardyń júzínde qobalju da, sením de, daıyndyqtyń nyq ízí de baıqaldy.
Kópshílígí muzykaǵa bala kúnínen áuestengen. Bírí - gıtaramen án oryndady, bírí - estradalyq baǵytta, endí bírí - klassıkalyq shyǵarmalardy sheberlíkpen jetkízdí. Būl jandardyń ónerín tamashalap, qoldau kórsetuge tanymal óner ıelerí de keldí. Aıjan Nūrmaǵambetova men Bek Oralbekov qazylar alqasy retínde ádíl baǵasyn beríp, jeńímpazdarǵa syılyqtardy tabystady. Ūıymdastyrushylardyń aıtuynsha, mūndaı sharalar qatysushylarǵa ǵana emes, qoǵamnyń ózíne de auadaı qajet.
«Bízdíń maqsat - zaǵıp jandardy ayau emes, olardyń múmkíndígín kórsetu. Olar bízden áldeqaıda jígerlí, qaısar. Sondyqtan mūndaı ís-sharalardy tūraqty túrde ótkízudí qolǵa alyp kelemíz. Kelesí jyly osy baıqaudy fılıaldar arasynda keńeıtíp, respublıkalyq deńgeıge shyǵarudy josparlap otyrmyz. Aldyńǵy jyly da dál osy shara ótken bolatyn. Sol kezde bas júlde alǵan qatysushylardy bıyl qaıta qospaudy jón kórdík. Búgín 13 qatysushy óner kórsetedí. Jeńímpazdarǵa aqshalaı syılyqtar tabystalady. Bas júlde - 200 000 teńge, bírínshí oryn - 150 000 teńge, ekínshí oryn — árqaısysyna 100 000 teńgeden ekí jeńímpazǵa, al úshínshí oryn - úsh qatysushyǵa 50 000 teńgeden beríledí», - deıdí «Qazaq zaǵıptar qoǵamy» qoǵamdyq bírlestígíníń fılıal basshysy Altynaı Qońyratbaıqyzy.
Baıqau barysynda árbír qatysushy óz qūlshynysy men jan dúnıesín júrek terbeıtín ánder arqyly kórsettí. Bírí - ata-anasyna alǵys arnady, bírí - tuǵan jerdí jyrlady, endí bírí – ómírdí óz kózderímen kórudí ańsaıtyndaryn ózderíníń avtorlyq ánderímen jetkízdí. Baıqaudyń atauy kezdeısoq qoıylmaǵan. «Men sení súıem, Ómír!» - būl zaǵıp jandardyń ómírge degen ūstanymy íspettí.
