Qazaqstan 2024 jyly V Dúnıejúzilik kóshpendiler oıyndaryn ótkizýge ótinim bergen.
Memleket basshysy Qasym-Jomart Toqaev Ulttyq sport qaýymdastyǵynyń prezıdenti Islambek Saljanovty qabyldady, dep habarlaıdy Almaty-akshamy.kz Aqordaǵa silteme jasap.
Qasym-Jomart Toqaevqa qaýymdastyqtyń byltyr atqarǵan jumystarynyń qorytyndysy men aldaǵy kezeńge arnalǵan jospary týraly baıandaldy.
Islambek Saljanovtyń aıtýynsha, kókpar, jamby atý, aýdaryspaq, teńge ilý, báıge, qusbegilik, dástúrli sadaq atý, toǵyzqumalaq jáne asyq atý sekildi ulttyq sport túrleriniń federasıalary qaýymdastyq aıasyna biriktirilgen. Sonymen qatar ulttyq sporttyń damýyna saraptama jasalyp, jeke-jeke respýbıkalyq federasıalarmen ınstıtýsıonaldyq turǵyda jumys júrgizile bastaǵan.
2024 jyly V Dúnıejúzilik kóshpendiler oıyndaryn ótkizýge bergen Qazaqstannyń ótinimin byltyr qyrkúıek aıynda Búkilálemdik etnosport konfederasıasy biraýyzdan qoldady.
Kezdesýde Qasym-Jomart Toqaev kelesi jyly elimizde ótetin aýqymdy sharany sapaly ári joǵary deńgeıde uıymdastyrý jóninde naqty tapsyrmalar berdi. Memleket basshysynyń aıtýynsha, V Dúnıejúzilik kóshpendiler oıyndary ulttyq sport sharalarymen shektelmeýi kerek. Atalǵan halyqaralyq sport saıysy qolóner, týrızm, qyzmet kórsetý salasy sıaqty shaǵyn jáne orta bıznes ókilderi úshin de tıimdi uıymdastyrylyp, kásipterin ilgerletýge jaǵdaı jasalýy qajet.
Sonymen qatar Qazaqstan Prezıdenti ulttyq sport túrleriniń damý tujyrymdamasyn ázirleý qajet ekenin jáne at sporty oıyndaryndaǵy qaýipsizdik máselesin qarastyrýdy tapsyrdy.