Bıznesti negizsiz basy artyq baqylaýǵa, qylmystyq qýdalaýǵa jol joq.
Bıyl bıznesti negizsiz qýdalaýdan qorǵaý sharalarynyń arqasynda 60 myń kásipkerge salynǵan 700 mln teńge aıyppuldyń kúshi joıylǵan. Bul jaıynda Prezıdent Qasym-Jomart Toqaev «Altyn sapa» jáne «Paryz» syılyqtarynyń ıegerlerin marapattaý saltanatynda sóılegen sózinde málim etti, dep habarlaıdy Almaty-akshamy.kz QazAqparatqa silteme jasap.
«Bıznesti retteýdiń jańa tásilderi is júzinde 2024 jyldan bastap jumys isteı bastaýy kerek.Ekinshi – bıznestik tekserý jáne qylmystyq qýdalaý. Men buǵan deıin de bıznesti negizsiz basy artyq baqylaýǵa, qylmystyq qýdalaýǵa jol joq ekenin aıtqanmyn. Bul – meniń nyq ustanymym. Bul baǵytta biz kásipkerlerdi negizsiz tekserýlerden arashalap, qylmystyq qýdalaýdyń orbıtasyna negizsiz tartýdy boldyrmaý úshin sharalar keshenin qabyldadyq», - dedi Memleket basshysy.
Al kásipkerlerdi negizsiz qyspaqqa alǵan 1000-nan astam sheneýnik jazalanǵan.
«Bıyl 60 myńnan astam kásipker jalpy somasy 700 mln teńgedeı zańsyz aıyppuldan bosatyldy. 1200 tyıym salý, shekteý sharalarynyń kúshi joıyldy. Kásipkerlerge qatysty quqyqqa qaıshy áreketteri úshin myńnan astam laýazymdy tulǵanyń jazalanǵany mańyzdy», - dedi Prezıdent.
Aıta keteıik, osynaý saltanatty shara aıasynda úzdik dep tanylǵandarǵa «Qazaqstannyń úzdik taýary», «Qazaqstan Project Management Awards -2022», «TMD boıynsha sapa salasyndaǵy 2021 jyldyń syılyǵy» sıaqty kásipkerlik baǵyttaǵy marapattar da tabystaldy.
Sondaı-aq, «ArýAna», «Bıznes Kemeldilik», «İsker», «Uly dala eli» syılyqtarynyń jeńimpazdary da marapattaldy.
Bıyl «Altyn sapa» syılyǵyna 281 úmitker ótinim tapsyrǵan. Sarapshylar sonyń ishinen iri, orta jáne shaǵyn bıznes boıynsha 14 bıznes nysanyn 4 atalym negizinde iriktep aldy.