Elimizde teatr qyzmetiniń baǵasy 26%-ǵa ósken.
Jalpy demalys jáne sport salasyndaǵy qyzmetterdiń kólemi bir jylda 60%-dan astam qymbattaǵan, dep habarlaıdy Almaty-akshamy.kz Energyprom.kz saıtyna silteme jasap.
2021 jylǵy qańtar-jeltoqsanda Qazaqstan Respýblıkasynda sport, demalys jáne oıyn-saýyq salasyndaǵy qyzmetter 400,5 mlrd teńgeni qurady, bul bir jyl burynǵydan 60,9%-ǵa artyq.
Ekonomıkanyń baqylanbaıtyn sektoryn esepke almaǵanda, bul salada 399,2 mlrd teńgege qyzmet kórsetilgen. Qundyq mándegi jyldyq ósim 67,9%-dy qurady.
Óńirlik turǵydan alǵanda, qyzmet kórsetýdiń 58,4%-y bir ǵana – Almaty oblysyna tıesili: 233,3 mlrd teńge, bul 2020 jylǵy qańtar-jeltoqsanmen salystyrǵanda aqshalaı túrde 5,7 ese kóp. Úzdik úshtikke sondaı-aq elorda (43,6 mlrd teńge, mınýs 37,2%) jáne Qaraǵandy oblysy (13,9 mlrd teńge, mınýs 16,7%) kiredi.
Sport salasynda 114,4 mlrd teńgege, demalys jáne oıyn-saýyq salasynda 284,8 mlrd teńgege tikeleı qyzmet kórsetildi.
Sport salasyndaǵy qyzmetterdiń eń kóp kólemin sport klýbtary kórsetti: 25,9 mlrd teńge, bul jylyna 9,9%-ǵa artyq degen sóz. Odan keıingi orynda fıtnes-klýbtardyń qyzmeti jáne sport nysandaryn paıdalaný qyzmetteri tur.
Kóńil kóterý jáne demalys salasynda negizgi kólemdi oıyn-saýyq jáne túrli saıabaqtardyń qyzmetteri qurady: 9,2 mlrd teńge, ıaǵnı jyldyq ósimi 77,2%. Odan keıingi rette qýyrshaq teatrlarynyń, sonymen qatar bı zaldary men dıskotekalardyń qyzmetteri bar.
Aǵymdaǵy jyldyń aqpan aıynyń qorytyndysy boıynsha, demalys, oıyn-saýyq jáne mádenıet salasyndaǵy qyzmetterdiń quny bir jylda 6,2%-ǵa ósti. Onyń ishinde teatr qyzmetteri 26,2%-ǵa, baseınder (abonement) 9,6%-ǵa, balalar atraksıondary 7,4%-ǵa, kınoteatrlar 5%-ǵa, sport zaldary (jazylý) 4,7%-ǵa qymbattady. Fotograftardyń qyzmeti 5,4%-ǵa qymbattady.
Óńirlik turǵydan qaraǵanda, bul sektordaǵy baǵanyń eń qatty qymbattaýy Almaty oblysynda tirkeldi: birden jylyna 15,2%-ǵa ósken. Budan keıingi orynda Qyzylorda oblysy (12,4%) jáne Shymkent qalasy (10,3%) da bar. Al, Qaraǵandy oblysynda osy sala boıynsha qyzmet kórsetý qunynyń azdap qana, ıaǵnı 0,1%-ǵa tómendeýi baıqaldy.