Belgili akter ári aralas jekpe-jek sheberi Erkebulan Toqtar «Qazaqstannyń eńbek sińirgen qaıratkeri» ataǵyn alýyna qatysty aıtylǵan syn-pikirlerge túsinikteme berdi. Bul týraly ol jýrnalıs Aman Tasyǵanǵa bergen suhbatynda aıtty, dep habarlaıdy Aqshamnews.kz tilshisi.
«Ataqty nege bergen degen suraq qoıylyp jatyr. Nege ekenin bilmeımin, ol suraq maǵan qoıylyp jatyr. Ony bergen adamǵa qoıý kerek. «Nege berdiń?» dep surasyn. Al menen «Nege aldyń?» dep surasa, «maǵan berdi, men aldym» jaýap beremin. Ony joǵary jaqtaǵy adamdar sheshti», - deıdi akter.
Erkebulan Toqtar jurt oılaǵandaı ol ataqtyń materıaldyq turǵydan paıdasy joq ekenin atap ótti.
«Kelip-ketip jatqan paıdasy joq. Men jeńildik almaımyn, memleketten aqsha almaımyn. Tegin emdelýge bolady eken dep estip qaldym. Men tegin emdelmeımin, óıtkeni ózimniń dárigerlerim bar, solarǵa aqsha tólep júrmin. Eshqandaı jeńildik qyzyq emes. Keıbireýler nagrada berilgen soń úkimetten aqsha alady dep oılaıdy. Bir tıyn da almaımyn, maǵan keregi de joq. Nagrada berdi, qolyn qaıtarmadym. Óte qýanyshty boldym. Oǵan laıyqtymyn ba, joq pa, ony bergen adam sheshetin shyǵar. Qalǵandary sóıleı beredi. Olardyń eshqaısynyń aýzyn japqym kelmeıdi. Men týraly kóp aıtylǵany jaqsy. Jaqsy aıtsyn, jaman aıtsyn, mańyzdy emes. Bireýge unaımyn, bireýge unamaımyn», - dep túıindedi ol.
Qazaqstan premer-mınıstriniń orynbasary, mádenıet jáne aqparat mınıstri Aıda Balaeva 8 jeltoqsanda Erkebulan Toqtarǵa «Qazaqstannyń eńbek sińirgen qaıratkeri» ataǵyn tapsyrǵan bolatyn.