Aıý qyzǵa tıisken joq, bala bes metrge jýyq bıiktikten qulaǵandyqtan ǵana zardap shekti
Tashkent zoobaǵynda áıel kishkentaı qyzyn aıýdyń volerine laqtyryp jiberdi. Jyrtqysh balaǵa tıisken joq. Qyz bes metr bıiktikten qulaǵandyqtan ǵana zardap shekti, dep habarlaıdy Almaty-akshamy.kz Sputnik saıtyna silteme jasap.
«28 qańtarda nege ekeni belgisiz, jas áıel jurttyń kóz aldynda kishkentaı qyzyn aıý qamalǵan volerge laqtyryp jiberdi», – delingen zoobaqtyń Telegram-kanalynda.
Baspasóz qyzmetiniń aqparatynsha, Zýzý esimdi kavkazdyq qońyr aıý metal qorshaýdyń ar jaǵynan áıeldiń is-qımylyn baqylap turǵan. Sodan keıin aqyryn orǵa túsip, qyzǵa jaqyndap, ıiskep, artynan ketip qalǵan.
«Zoobaq qyzmetkerleri aıýdy volerdiń ishki jaǵyna qaraı aldap alyp ketti. Qyz bes metrge jýyq bıiktikten qulaǵandyqtan ǵana zardap shekti», – dep túsindirdi zoobaqtaǵylar.
Aıý Tashkentke 2017 jyly Baký zoobaǵynan jetkizilgen. Óziniń qylyǵymen, jurtqa ashyqtyǵymen búkil ujymnyń súıikti jyrtqyshyna aınaldy.
«Qazirgi tańda quqyq qorǵaý organdary oqıǵanyń sebepterin tergep jatyr. Bala dárigerlerdiń baqylaýynda. Tashkent zoobaǵy medısınalyq kómekke jumsalatyn shyǵyndy óz moınyna alady jáne qyzdyń tezirek saýyǵyp ketýin tileıdi», – dedi baspasóz qyzmetindegiler.