Úkimet otyrysynda Premer-Mınıstrdiń orynbasary Qanat Bozymbaev sý tasqynynan zardap shekken 34 myńnan astam otbasy jalpy somasy 12,6 mlrd teńgege 100 AEK mólsherinde birjolǵy tólem alǵanyn habarlady.
Vıse-premer 2024 jylǵy sý tasqyny 120 myńnan astam adamnyń ómirine áser etkenin atap ótti. Memleket tarapynan zardap shekkenderge barlyq qajetti kómek kórsetildi – baspanasyz qalǵandar úshin evakýasıalyq pýnktter uıymdastyryldy, 34 myńnan astam otbasy jalpy somasy 12,6 mlrd teńgege 100 AEK mólsherinde birjolǵy tólem aldy. Sonymen qatar zardap shekken 21 880 otbasy úshin jalpy somasy 10 mlrd teńgege 150 AEK mólsherinde keltirilgen materıaldyq zalal óteldi.
Sý tasqyny saldarynan shaǵyn jáne orta bıznes sýbektilerine keltirilgen múlik shyǵyndarynyń ótemaqysy retinde maquldanǵan 615 ótinish boıynsha 10,2 mlrd teńgeden astam qarajat tólendi. Shaǵyn jáne orta bıznestiń shyǵyndaryn óteý jónindegi Erejeniń kúshi 2025 jyldyń sáýirine deıin uzartylady. Budan basqa, AÓK sýbektilerine keltirilgen zalaldy óteý úshin shamamen 3,15 mlrd teńge bólindi.