Premer-mınıstr Oljas Bektenov Úkimet otyrysy kezinde mańyzdy qońyraý qabyldap, Úkimet otyrysynan shyǵyp ketti, dep habarlaıdy Aqshamnews.kz tilshisi.
Úkimettiń seısenbi kúni saǵat 10:00-de bastalǵan otyrysy kezinde kútpegen jaǵdaı boldy. Premer-mınıstr Oljas Bektenovke úkimettik baılanys telefonyna qońyraý tústi.
Otyrystyń basynda Bektenov jańadan taǵaıyndalǵan oqý-aǵartý mınıstri Juldyz Súleımenovany tanystyryp, onyń Konstıtýsıaǵa ant berý rásimin ótkizdi. Dál osy sátte premerdiń úkimettik baılanys telefony shyryldap, Bektenov qońyraýǵa jaýap berip, zaldan shyǵyp ketti.
Jıyndy ýaqytsha birinshi vıse-premer Roman Sklár júrgizdi. Ol mınıstrlerdiń kún tártibindegi baıandamasyn jalǵastyryp, Densaýlyq saqtaý mınıstri Aqmaral Álnazarovany trıbýnaǵa shaqyrdy.
Oljas Bektenov zalǵa kóp kidirmeı, shamamen 12-shi mınýtta qaıta oraldy.
Mundaı jaǵdaılar sırek kezdesedi, ádette premer-mınıstr otyrysty tolyq ózi basqarady. Sarapshylardyń pikirinshe, bul qońyraý asa mańyzdy bolǵan bolýy múmkin, sebebi zaldaǵy telefon baılanysy memleket basshysymen jáne joǵary deńgeıdegi shuǵyl baılanys úshin qoldanylady.
Aıta keteıik, buǵan deıin, 29 qyrkúıekte Prezıdent Qasym-Jomart Toqaev burynǵy Oqý-aǵartý mınıstri Ǵanı Beısembaevty qyzmetinen bosatyp, onyń ornyna Juldyz Súleımenovany taǵaıyndaǵan edi.