Almatyda aýa raıynyń kúrt sýytýyna baılanysty jylytý maýsymy ádettegiden erterek bastalady, dep habarlaıdy Aqshamnews.kz tilshisi.
"Qala ákimi Darhan Satybaldynyń tapsyrmasymen 8 qazannan ortalyq jylýǵa qosý jumystary júrgiziledi", – dep málimdedi Almaty qalasynyń Energetıka jáne sýmen jabdyqtaý basqarmasy.
Aldymen qaı nysandar qosylady?
Basqarma dereginshe, eń áýeli jylý balabaqshalarǵa, mektepterge jáne medısınalyq uıymdarǵa beriledi. Kópqabatty turǵyn úılerdi qosý 10 qazannan bastalady. Úılerge jylý berilgen soń KSK jáne OSI mamandary ishki júıelerdi rettep, radıatorlar men qurylǵylardan aýany jiberedi, qysymdy teńshep, páterlerdiń birkelki jylynýyn qamtamasyz etedi.
“AlJJ” daıyndyǵy
Qalanyń jylý kesheni – “AlJJ” kompanıasynda sırkýlásıalyq rejım iske qosylǵan, bul qajet bolǵan jaǵdaıda barlyq aýdanǵa jedel jylý berýge múmkindik beredi. Kásiporyn qys maýsymyna tolyq daıyn ekenin habarlady: yqtımal aqaýlarǵa jedel áreket etý úshin materıaldar men jabdyqtardyń avarıalyq qory jasaqtalǵan. 2025–2026 jylǵy jylytý maýsymynda táýlik boıy kezekshilikte 16 avarıalyq jáne jóndeý brıgadasy (barlyǵy 220 maman, 56 tehnıka) jumys isteıdi.
Normatıv týraly eske salý
Buǵan deıin basqarma jylytý maýsymyn bastaý týraly sheshim syrtqy aýanyń táýliktik ortasha temperatýrasy +8°C jáne odan tómen deńgeıde qatarynan bes táýlik saqtalǵanda qabyldanatynyn habarlaǵan bolatyn. Kúrt sýytýǵa baılanysty bıyl qosý merzimi ilgeri jyljytyldy.