Iranda kóp jyldar boıy qyzý pikirtalas pen narazylyqtarǵa sebep bolǵan mindetti hıdjab taǵý máselesinde mańyzdy ózgeris qabyldandy, dep habarlaıdy Aqshamnews.kz tilshisi. Qatań erejeler jeńildetilip, áıelderge qatysty burynǵy shekteýlerdiń kúshi joıyldy.
Irannyń Maqsatqa sáıkestik keńesiniń múshesi Mohammadreza Bahonardyń málimdeýinshe, endi hıdjabty mindetti túrde taǵý talaby joq. Onyń aıtýynsha, hıdjab kımeıtin áıelderge aıyppul da, jaza da, zańdyq shekteýler de qoldanylmaıdy.
Bul sheshimnen keıin eldiń kósheleri men qoǵamdyq oryndarynda hıdjabsyz júrgen áıelderdi jıirek kórýge bolady. Áleýmettik jelide áıelderdiń erkin júrip-turýyn kórsetetin beınejazbalar jyldam taralyp, qyzý talqyǵa tústi.
Buǵan deıin ne boldy?
Iranda hıdjab zańyna qarsy narazylyqtar 2022 jyly erekshe órship ketken bolatyn. Sol kezde 22 jastaǵy Mahsa Amını esimdi jas qyz "durys kıinbedi" degen aıyppen "ar-namys polısıasy" tarapynan ustalǵan soń kóz jumǵan. Bul oqıǵa búkil eldi dúr silkindirip, áıelder kópshilik aldynda hıdjabtaryn sheship, tipti óz-ózderin órteýge deıin barǵan. Aksıalardy basý kezinde 550-den asa adam qaza taýyp, myńdaǵan azamat tutqyndalǵan edi.
Sol narazylyqtar kezinde Tegerandaǵy Islam ýnıversıtetiniń stýdent qyzdarynyń biri qýdalaýdan qashyp, tipti kóshede ish kıimmen júrgen edi.
Irandaǵy bul jańa sheshim áıelder quqyǵy men erkindigi turǵysynan tarıhı qadam retinde baǵalanyp jatyr.