Tamyz aıynda ótken joly aıtqanymyzdaı, birqatar amal bolady, juldyzdar týady. Shilde ótkesin Sholpan juldyz tań aldynda shyǵystan jarqyrap týsa, kúz jıyn-terimge qolaıly, qys sharýaǵa jaıly bolady degen burynnan kele jatqan boljam bar. Qazir shilde aıaqtalyp, kúzdiń nyshany sezile bastady. Osy mezgilde uıqysyn qıyp, tańnan buryn shyǵysqa kóz salǵan adamnyń Sholpan juldyzyn ańǵarary anyq.
Qazekeń tań aldynda shyǵys ońtústik jaqtan jarqyrap kórinip, kókjıekti erekshe jaryq etip turatyn úlken juldyzdy «Sholpan juldyzy» dep ataǵan. Bul juldyzdyń «altyn juldyz», «tańsholpan», «kerýen juldyz», «tańsóger», «tańtańba», «shopan juldyz», «malshy juldyz» degen de ataýlary bolǵan. Sholpan juldyzy men Tańsholpan juldyzynyń qatar týǵanyn kórgen adam jeti atasyna deıin baqytty, taýsylmas dáýletti, mol yrzyqty bolady, uzaq ómir súredi degen yrym-joramalymyz da joq emes...
Bul eki juldyzdy tańmen talasa oıanǵan qyz ben jigit qatar kórse, eki dúnıede bir-birine ǵashyq bolyp, aralaryna jamandyq kirmeı, urpaqty, ǵumyrly bolady dep eseptegen.
Tamyzdyń ekinshi oqıǵasy – shóp qataıatyn, gúl «qartaıatyn» Tarazy týady... «Tarazy týǵan túni shóp sabaǵy dári», «em izdeseń tarazynyń shóbinen izde, jem izdeseń tarazynyń shóbin kúze» degen tamasha támsil bar.
Tabıǵat tamyrshysy atanǵan baıyrǵy babalar jaz ortasy aýa bastaǵannan aspan juldyzdaryna kóz tigetin bolǵan. Qaı kúni aspannan jarq etip Tarazy juldyzy týa qalsa, kúzdik jıyn-terimge kirisedi. Maldardy qyrdyń aq otyna qaraı aıdap baǵady. Bir juma oıdyń kók otyna, bir juma qyrdyń aq otyna baqqan maldyń eti men sorpasy dárige aınalady, emdik qýaty joǵarylaıtynyn qazekeńe ómirdiń ózi úıretken.
Qazaq analary bul kezdegi aıran, sút, qurt, irimshik, irkit, shubatty dári retinde balalaryna meılinshe ishkizip-jegizedi. Ásirese, «qymyzdyń dámi keldi, tarazy týdy, qymyz dári, sary qymyz – aýrýǵa em dári qymyz» dep uǵynǵan.
Tarazy juldyzy jaz ben qystyń, kóktem men kúzdiń, ystyq pen sýyqtyń, salqyn men jylynyń arasyn tarazylap turady. Sondyqtan bul juldyzdy qazaq «tarazy juldyzy» nemese «qazy juldyz» dep atap ketken. Tarazy juldyzy týǵan kúnnen bastap kúzdiń alǵashqy usaq marjan, salqyn jańbyry bastalady. Qyrdyń qara oty tarazy jańbyrymen qaıta jaıqalyp ósip tolady. Artynan tez sirge aınalady. Jaıylym malǵa erekshe juǵymdy bola bastaıdy. Tórt túlik tez qońdanady, shildenedi. Shynylanyp, jup-jumyr bolyp semiredi...
Bıyl qoıan jyly ekenin esten shyǵarmaıyq. Buryn-sońdy bolmaǵan nebir apatty, qaıǵy oqıǵalar elimizde ǵana emes, álemde oryn alyp jatyr... Shyǵys Qazaqstan oblysynda qar jaýdy. 14 tamyzda tańerteń Belýha taýynyń aınalasyn qar basyp qaldy. Sınoptıkter oblysta daýyldy eskertý jarıalady. Kúndiz aımaqtyń soltústigi men shyǵysynda naızaǵaı kútiledi. Ońtústik-batystan soǵatyn jel oblystyń soltústiginde, shyǵysynda sekýndyna 15–20 metrge jetedi.