Deklarasıa usynbaǵan jeke tulǵaǵa qandaı jaza qoldanylady
Astana qalasy boıynsha Memlekettik kirister departamenti basshysynyń orynbasary Qanat Baltabekov deklarasıa usynbaǵan jeke tulǵalarǵa qandaı jaýapkershilik qarastyrylǵanyn aıtty, dep habarlaıdy Almaty-akshamy.kz.
«Aktıvter men mindettemeler týraly deklarasıany usynbaǵan jaǵdaıda ákimshilik jaýapkershilik kózdelgen. «Ákimshilik quqyq buzýshylyq týraly» Qazaqstan Respýblıkasy kodeksiniń 272-babynyń 1-tarmaǵyna sáıkes aktıvter men mindettemeler týraly deklarasıany Qazaqstan Respýblıkasynyń zańnamalyq aktilerinde belgilengen merzimde usynbaý aldyn ala eskertýge ákep soǵady. 1 jyl ishinde qaıtalap jasalǵan áreketter 15 aılyq eseptik kórsetkish (1 AEK - 3450 teńge) mólsherinde aıyppul salýǵa ákep soǵady. Jalpyǵa birdeı deklarasıalaý boıynsha suraqtar týyndaǵan jaǵdaıda jeke tulǵalar 1414 nómiri boıynsha biryńǵaı baılanys ortalyǵynan keńes ala alady»,- dedi Qanat Baltabekov Astana qalasynyń komýnıkasıalar qyzmetindegi brıfıńte.
Atalǵan departamentke qarasty jalpyǵa birdeı deklarasıalaý jáne óndiristik emes tólemder bóliminiń basshysy Erasyl Borashtyń aıtýynsha, deklarasıa 12 tarmaqtan turady. Deklarasıany 15 qyrkúıekke deıin «salyq tóleýshiniń kabıneti» cabinet.salyk.kz arqyly,«elektrondyq úkimet» portaly, sondaı-aq esalyq azamat mobıldik qosymshasy arqyly elektrondy túrde, al qaǵaz úlgide 15 shildege deıin berýge bolady.