Ár aımaqtyń óz erejeleri bar.
Ony alý úshin ne isteý kerek,Almaty qalasyndaǵy joldamalardy bólý mehanızmi qandaı?
Densaýlyq saqtaý mınıstrliginiń aqparaty boıynsha, shıpajaıǵa tegin jáne jeńildikpen joldamalardy Qazaqstan azamattaryna jergilikti atqarýshy organdar, ıaǵnı ákimdikter beredi.
Shıpajaıǵa tegin joldama alý jaıly aqparat Almaty qalasynda áleýmettik kómek kórsetýdiń, onyń mólsherlerin belgileýdiń jáne muqtaj azamattardyń jekelegen sanattarynyń tizbesin aıqyndaýdyń qaǵıdalaryn bekitý týraly VIII saılanǵan Almaty qalasy máslıhatynyń kezekten tys XII sesıasynyń 2023 jylǵy 8 jeltoqsandaǵy № 73 sheshiminde usynylǵan.
Tegin jáne jeńildetilgen joldamalardy kimder ala alady?
Myna sanattaǵy adamdarǵa shıpajaılyq-kýrorttyq emdelýge áleýmettik kómek kórsetiledi:
Qazaqstan Respýblıkasynyń "Ardagerler týraly" Zańynyń 4-babyna sáıkes mártebesi belgilengen Uly Otan soǵysynyń ardagerleri – jan basyna shaqqandaǵy ortasha tabysty esepke almaı, tegin;
mártebesi Qazaqstan Respýblıkasynyń "Ardagerler týraly" Zańynyń 7-babymen belgilengen eńbek ardagerleri – jan basyna shaqqandaǵy ortasha tabysty esepke almaı, memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Uly Otan soǵysynda qaza tapqan (qaıtys bolǵan, habar-osharsyz ketken) jaýyngerlerdiń qaıta nekege turmaǵan jesirleri – jan basyna shaqqandaǵy ortasha tabysty esepke almaı memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Uly Otan soǵysynyń qaıtys bolǵan múgedektigi bar nemese jeńildikter boıynsha Uly Otan soǵysynyń múgedektigi barǵa teńestirilgen adamnyń qaıta nekege turmaǵan jubaıy (zaıyby), sondaı-aq jalpy aýrýǵa shaldyǵý, jumysta mertigý jáne basqa da sebepter (quqyqqa qaıshy keletinderdi qospaǵanda) saldarynan múgedek dep tanylǵan, Uly Otan soǵysynyń qaıtys bolǵan qatysýshysynyń, partızannyń, astyrtyn áreket etýshiniń, "Lenıngradty qorǵaǵany úshin" medalimen nemese "Qorshaýdaǵy Lenıngrad turǵyny" belgisimen nagradtalǵan azamattyń qaıta nekege turmaǵan jubaıy (zaıyby) – jan basyna shaqqandaǵy ortasha tabysty esepke almaı memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Ekinshi dúnıejúzilik soǵys kezeńinde fashıser men olardyń odaqtastary qurǵan konslagerlerdiń, gettolardyń jáne basqa da eriksiz ustaý oryndaryndyń kámeletke tolmaǵan tutqyndaryna – jan basyna shaqqandaǵy ortasha tabysty esepke almaı memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Lenıngrad qalasyndaǵy qorshaý kezeńinde qalanyń kásiporyndarynda, mekemeleri men uıymdarynda jumys istegen jáne "Lenıngradty qorǵaǵany úshin" medalimen nemese "Qorshaýdaǵy Lenıngrad turǵyny" belgisimen nagradtalǵan azamattarǵa – jan basyna shaqqandaǵy ortasha tabysty esepke almaı memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Qazaqstan Respýblıkasynyń Áleýmettik kodeksiniń 207 babynyń 1-tarmaǵyna sáıkes zeınet jasyna tolǵan basqa memleketterdiń aýmaǵyndaǵy jaýyngerlik qımyldarynyń ardagerleri – jan basyna shaqqandaǵy ortasha tabysty esepke almaı memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
Qazaqstan Respýblıkasynyń Áleýmettik kodeksiniń 207 babynyń 1-tarmaǵyna sáıkes zeınet jasyna tolmaǵan basqa memleketterdiń aýmaǵyndaǵy jaýyngerlik qımyldarynyń ardagerleri úshin – jan basyna shaqqandaǵy ortasha tabysy eń tómengi kúnkóris deńgeıiniń úsh eselengen mólsherinen aspaıtynyn eskere otyryp, sanatorıı-kýrorttyq emdelýge beriletin joldama qunynyń 25% mólsherinde tóleı otyryp, biraq eki jylda bir retten artyq emes;
Qazaqstan Respýblıkasynyń "Jappaı saıası qýǵyn-súrginder qurbandaryn aqtaý týraly" Zańynda belgilengen tártipke sáıkes Qazaqstandaǵy 1986 jylǵy 17-18 jeltoqsan oqıǵasyna qatysyp, aqtalǵan, Qazaqstan Respýblıkasynyń Áleýmettik kodeksiniń 207 babynyń 1-tarmaǵyna sáıkes zeınetkerlik jasqa tolmaǵandarǵa – sanatorıı-kýrorttyq emdelýge beriletin joldama qunynyń 25% mólsherinde tóleı otyryp, jan basyna shaqqandaǵy ortasha tabysy úsh eselengen kúnkóris deńgeıinen aspaıtyn shamany eskere otyryp, biraq eki jylda bir retten artyq emes;
jasyna baılanysty zeınetke shyqqan zeınetkerlerge – eń tómengi kúnkóris deńgeıiniń úsh ese mólsherinen aspaıtyn jan basyna shaqqandaǵy ortasha tabysy esepke alyna otyryp, memlekettik bazalyq zeınetaqy tóleminiń esebinsiz alatyn zeınetaqysynyń 25% mólsherinde tóleı otyryp;
birinshi toptaǵy múgedektigi bar adamdardy alyp júretin adamdarǵa olardyń sanatorıı – kýrorttyq emdelýdi usynatyn uıymda bolǵan kezeńinde, biraq bir ilesip júretin adamnan aspaıtyn merzimge-emdeý rásimderin qospaǵanda, turý jáne tamaqtaný úshin aqy tólenetin jan basyna shaqqandaǵy ortasha tabysyn esepke almaǵanda Qazaqstan Respýblıkasynyń sheginde sanatorıı-kýrorttyq emdelgeni úshin shyǵyndardy óteý;
birinshi toptaǵy múgedektigi bar adamdar.
Shıpajaılyq-kýrorttyq emdelýge áleýmettik kómek zattaı nysanda (Qazaqstan Respýblıkasynyń memlekettik satyp alý zańnamasyna sáıkes anyqtalǵan sanatorıı-kýrorttyq mekemelerge joldama) nemese aqshalaı túrde (Qazaqstan Respýblıkasynyń aýmaǵynda sanatorıı-kýrorttyq emdelý úshin ketken shyǵyndy tıisti qarjy jylyna búdjettik esepti jasaý barysynda bekitilgen joldamanyń quny mólsherinde óteý) kórsetiledi.
Qaıda barý kerek?
Shıpajaıǵa joldamalardy rásimdeý úshin Almaty aýdandarynyń ákimdikterine júginý qajet. Olardy áleýmettik kómek kórsetý jónindegi ýákiletti organdar aıqyndady.
Qandaı qujattar kerek?
Zattaı nysandaǵy sanatorıı-kýrorttyq emdelýge áleýmettik kómekti alý úshin ótinish berýshi áleýmettik kómek kórsetý jónindegi ýákiletti organǵa ótinishke qosa mynadaı qujattardy:
jeke basyn kýálandyratyn qujat;
№ 068/ý nysanyndaǵy anyqtama;
Uly Otan soǵysynyń ardagerleri Qazaqstan Respýblıkasynyń "Ardagerler týraly" Zańynyń 9-babymen kórsetilgen qujatty;
1986 jylǵy 17-18 jeltoqsan oqıǵasyna qatysqandar Qazaqstan Respýblıkasynyń "Jappaı saıası qýǵyn-súrgin qurbandaryn ońaltý týraly" Zańyna sáıkes ońaltý týraly kýálik;
joldamany alý zeınetaqy mólsherine baılanysty bolatyn adamdar zeınetaqy mólsheri týraly qujat;
zeınetkerlik jasqa tolmaǵan basqa memleketter aýmaǵyndaǵy jaýyngerlik áreketterge qatysqan ardagerler, 1986 jylǵy 17-18 jeltoqsandaǵy Qazaqstandaǵy oqıǵalarǵa qatysqan jáne zeınetkerlik jasqa tolmaǵan adamdar, sondaı-aq zeınetker jasyna jetpegen adamnyń jáne/nemese onyń otbasy músheleriniń tabystary týraly málimetter;
múgedektigi bar adamnyń áleýmettik kómek kórsetý jónindegi ýákiletti organǵa bergen sanatorıı-kýrorttyq uıymnyń joldamasynyń kóshirmesi, tólemdi rastaıtyn qujat, sanatorıı-kýrorttyq uıymnyń oryndalǵan jumystarynyń aktisi.
Salystyryp tekserý úshin qujattar túpnusqada jáne kóshirmelerde usynylady. Salystyrǵannan keıin qujattardyń túpnusqalary ótinish berýshige qaıtarylady.
Eger adam shıpajaıǵa bara almasa...
Eger adam joldama alsa, biraq dáleldi sebeptermen bara almasa, ol joldamany ákimdikke qaıtarýy kerek. Sodan keıin olar ony basqa adamǵa bere alady.
Eger oryn bos bolsa, joldamany basqa ýaqytqa aýystyrýǵa bolady. Biraq ony siz aıyrbastaýǵa jatatyn joldamada kórsetilgen shıpajaıǵa kirý kúninen keminde úsh kún buryn jasaýyńyz kerek.
Eger joldamany óz betinshe tólep qoıdyńyz, alaıda ótemaqy alǵyńyz kelse...
Shıpajaılyq-kýrorttyq emdelýge aqshalaı túrde áleýmettik kómek alý úshin aýdan ákimdigine júginý qajet. Ony 60 kúntizbelik kún ishinde, biraq shıpajaıǵa kirý kúnine deıin 10 kúntizbelik kúnnen keshiktirmeı jasaý kerek.
Joldama alý quqyǵyńyzdy rastaıtyn qujattardy (olar joǵaryda kórsetilgen) túpnusqalar men kóshirmelerde usyný qajet. Túpnusqalar kóshirmelermen salystyrylady jáne birden ótinish berýshige qaıtarylady.
Sodan keıin ákimdikte ótinish bildirgen adamǵa ótemaqy tóleý týraly sheshim qabyldanady.
Eger sheshim oń bolsa, onda emdelýden ótkennen keıin 30 kún ishinde ákimdikke shot-faktýrany, fıskaldyq chekti, oryndalǵan jumystar aktisin jáne óziniń banktik shotynyń nómirin usyný qajet bolady.
Aqsha osy qujattardy tapsyrǵannan keıin 30 kún ishinde túsedi.
Joldamany ne úshin bermeýi múmkin?
Shıpajaılyq-kýrorttyq emdelýge áleýmettik kómek kórsetýden bas tartýy múmkin, eger:
ótinish berýshi durys emes málimetterdi usyndy;
ótinish berýshi onyń materıaldyq jaǵdaıyna jáne/nemese otbasynyń materıaldyq
jaǵdaıyna tekserý júrgizýden bas tartty;
otbasynyń jan basyna shaqqandaǵy ortasha tabysynyń mólsheri shıpajaılyq-kýrorttyq emdelýge áleýmettik kómek kórsetý úshin belgilengen shekten asyp ketti.
Memlekettik joldamalar arqyly shıpajaıǵa qanshalyqty jıi barýǵa bolady?
Memlekettik búdjet esebinen shıpajaılyq-kýrorttyq emdeý jylyna bir retten kóp emes jáne 12 kúntizbelik kúnnen aspaıtyn merzimge beriledi.