«Jańa Almaty» Keshendi josparynyń iske asyrylý barysyn saraptamalyq talqylaý aıasynda jol-kólik ınfraqurylymyn damytý máseleleri kóterildi dep habarlaıdy almaty-akshamy.kz
Dóńgelek ústel barysynda qalalyq Strategıa jáne búdjet basqarmasynyń basshysy Almas Batanov «Jańa Almatynyń» kólik qurylymyn qalyptastyrý týraly aıtyp berdi. Megapolıstiń kóshe-jol jelisiniń jalpy uzyndyǵy 3097 shaqyrymdy quraıdy. Bul rette qalaǵa qosylǵan shaǵyn aýdandarda 299 kılometr joldyń qatty jabyny joq. Jaqsy jáne qanaǵattanarlyq jaǵdaıdaǵy joldardyń úlesin 80%-dan 83%-ǵa deıin jetkizý josparlanýda.
«Shańyraq-5, Nurshashqan, Samǵaý, Álmerek, Qaırat, Ójet shaǵyn aýdandarynda joldardyń qurylysy men kúrdeli jóndeý aıaqtaldy. Sondaı-aq, uzyndyǵy 201,1 km 206 kósheniń ortasha jóndeýi aıaqtaldy, Dýman shaǵyn aýdanynyń 59 kóshesinde 30,5 km jol kúrdeli jóndeýden ótti. Uzyndyǵy 6,7 shaqyrym bolatyn Abaı men Saınnyń eki radıaldy kóshelerin tesý júrip jatyr», - dedi Almas Batanov.
Sonymen qatar, Taýsamaly kentindegi Iassaýı kóshesinen Rysqulov kóshesine deıin uzyndyǵy 1,2 shaqyrym bolatyn Almaty kóshesin qaıta jańartý aıaqtaldy. Rysqulov dańǵ. – Emsov k., Seıfýllın k. – Jansúgirov k., Buqtyrma k. - Qulja traktisi kólik aıyryqtarynyń qurylysy kestege sáıkes júrgizilýde.
2022 jyldyń birinshi toqsanynda qala mańyndaǵy joldar qaýipsiz bolady. 12 baǵdarsham obektisi ornatylady, 10 retteletin jáne 30 rettelmeıtin jaıaý júrginshiler ótkeli jasalady.
Jalpy, «Jańa Almaty» jol-kólik ınfraqurylymyn damytý qalaǵa qosylǵan shaǵyn aýdandardaǵy ómir sapasyn jaqsartady, qala turǵyndarynyń, sondaı-aq Almaty oblysyndaǵy aýdan turǵyndarynyń mobıldiligi artady.