Elimizde zańsyz shyǵarylǵan aktıvterdi memleketke qaıtarý jobasy jalǵasýda
Shetelden Qazaqstanǵa 670 mlrd teńge qaıtarylǵan. Bul týraly QR Qarjy mınıstri Erulan Jamaýbaev málim etti, dep habarlaıdy Almaty-akshamy.kz.
Depýtattar buǵan deıin elden zańsyz shyǵarylǵan qarajatty qaıtarýǵa qatysty berilgen tapsyrmalar oryndalmaı jatqanyn aıtyp, quzyrly organdardan aqparat jarıalaýdy talap etken bolatyn.
Bastamaǵa qatysty búgin Májilis qabyrǵasynda Qarjy mınıstri pikir bildirdi. Erulan Jamaýbaevtyń aıtýynsha, zańsyz shyǵarylǵan aktıvterdi memleketke qaıtarý jobasy boıynsha qazir Bas prokýratýra derekterdi jarıalaýdy qolǵa alǵan. Quzyrly organ málimetinshe, ótken kúzde sybaılas jemqorlyqtan tárkilengen 100 mlrd teńge qarasha aıynda mektep salýǵa jumsalatyn bolady.
«Birinshiden, bul aqparatty Bas prokýratýra berip otyrady. Aqparatty resmı habarlap otyratyn bir organ bolýy kerek qoı. Bas prokýratýra deregi boıynsha, qazirgi kúni 670 mlrd teńge elge qaıtarylǵan», – dedi QR Qarjy mınıstri Erulan Jamaýbaev.
Aıta keteıik, byltyr qarasha aıynda Memleket basshysy Qasym-Jomart Toqaev Zańsyz shyǵarylǵan aktıvterdi memleketke qaıtarý jónindegi sharalar týraly Jarlyqqa qol qoıdy.