Jańa Mınıstrler kabıneti jasaqtalady.
Senat tóraǵasy Máýlen Áshimbaev Memleket basshysynyń kelesi jyly aýqymdy kadrlyq ózgeris bolatyny týraly málimdemesine qatysty pikir bildirdi, dep habarlaıdy Almaty-akshamy.kz QazAqparatqa silteme jasap.
Aıta keteıik, 12 jeltoqsanda QR Prezıdenti Qasym-Jomart Toqaev 2023 jyly ortalyqta jáne jergilikti jerde aýqymdy kadrlyq ózgeris jasalatynyn aıtty.
Osy oraıda M. Áshimbaev Memleket basshysy Qasym-Jomart Toqaev Úkimetke áleýmettik, ınfraqurylym máseleleri, ekonomıkalyq ósim, kásipkerlikti qoldaý jáne basqa da salalar boıynsha tapsyrmalar bergenin eske saldy. Bul turǵyda Úkimet barlyq tapsyrmalardy oryndaýǵa, eldegi saıası, ekonomıkalyq jáne áleýmettik reformalardy odan ári júzege asyrýǵa, sondaı-aq Prezıdenttiń saılaý aldyndaǵy baǵdarlamasyn oryndaýǵa nazar aýdarýy kerek.
«Sondyqtan atqaratyn qyzmetine kim laıyq ekenin nemese kim jumysyn oryndaı alady degen baǵa berýim orynsyz bolar. Baǵalaý jáne sheshim qabyldaý – Memleket basshysynyń quzyreti. Prezıdent Úkimettiń keńeıtilgen otyrysynda túıtkildi máselelerdi de atap ótti. Budan ári Memleket basshysy jumysyn tıisti deńgeıde atqara alatyndardy baǵalap, tıisti sheshim qabyldaıdy dep oılaımyn», - dedi M. Áshimbaev Senattyń jalpy otyrysynan keıin tilshiler suraǵyna jaýap bere otyryp.
Sonymen qatar ol 2023 jyldyń birinshi jartyjyldyǵynda Májilisti saılaý josparlanyp otyrǵanyn aıtty. Qoldanystaǵy zańnamaǵa sáıkes, bul saılaý ótkennen keıin, Úkimet otstavkaǵa ketip, jańa Mınıstrler kabıneti jasaqtalady.
«Bul turǵyda Parlamentte naqty mınıstrler men Úkimet músheleri laýazymdaryna úmitkerler talqylanady. Osy oraıda kimniń qalyp, kimniń jumysyn jalǵastyratyny olardyń tıimdiligine, atqaratyn jumystaryna baılanysty bolady. Memleket basshysy tıisti baǵasyn beredi dep oılaımyn. Májilis saılaýynan keıin tıisti ózgerister bolýy múmkin. Biraq bul ózgerister Memleket basshysynyń quzyretine jatady», - dedi Senat tóraǵasy.