Senat depýtatynyń bir ornyna 6 adamnan úmitker. Bul týraly QR Ortalyq saılaý komısıasy tóraǵasynyń orynbasary Konstantın Petrov aıtty, dep habarlaıdy QazAqparat tilshisi.
«Osy jyldyń 29 qarashasy men 14 jeltoqsany aralyǵynda Parlament Senaty depýtattyǵyna 130 kandıdat usynyldy. Osylaısha, básekelestik 1 depýtat ornyna 6 adamnan astamdy quraıdy. Óńirler arasynda Abaı, Batys Qazaqstan, Qyzylorda oblystarynda usynylǵan kanıdattardyń sany basym – 8 adamnan, Astana men Almatyda – 10 adamnan. Eń az úmitker Aqmola, Aqtóbe, Shyǵys Qazaqstan, Almaty, Jambyl, Qostanaı, Pavlodar, Soltústik Qazaqstan oblystarynda usynyldy – 5 adamnan. Shymkent qalasynda bir orynǵa 6 kandıdat úmitker», - dedi ol búgin Ortalyq saılaý komısıasynyń otyrysynda.
Onyń dereginshe, kandıdattardyń ortasha jasy - 50,5 jas. Eń jas kandıdat Aqtóbe oblysynda – 30 jas. Al eń jasy úlkeni Batys Qazaqstan oblysynda – 74 jasta. Kandıdattardyń 25 paıyzy, ıaǵnı 130 adamnyń 33-i - áıel.
«Qazirgi ýaqytta kandıdattardy tirkeý prosesi júrip jatyr. Ol 24 jeltoqsanǵa deıin jalǵasady. Búginge deıin saılaý komısıalary 49 kandıdatty tirkedi. Básekelestik barlyq óńirde bar. Senat depýtattyǵyna kandıdattardy tirkeý qorytyndysy kúntizbelik josparǵa sáıkes jeke otyrysymyzda qaralady. Tirkeý kezeńi 24 jeltoqsan kúni jergilikti ýaqyt boıynsha saǵat 18.00-de aıaqtalady», - dedi Konstantın Petrov.