Ulttyq ulannyń Almaty qalasynda ornalasqan 3650 áskerı bóliminiń sarbazdaryna elimizdiń joǵarǵy oqý oryndaryna túsýge arnalǵan tegin bilim granttarynyń arnaıy sertıfıkaty tabystaldy.
Tegin bilim alýǵa múmkindik beretin granttar jaýyngerlik qyzmet jáne jaýyngerlik daıyndyq barysynda erekshe kózge túsken sarbazdarǵa berilgen.
– Ulttyq ulannyń 3650 áskerı bóliminde ár er azamattyń mindeti bolylyp tabylatyn Otan aldyndaǵy paryzymdy atqaryp júrmin. Áskerge kelip, armandaǵan joǵarǵy oqý ornyna túsýge múmkindik alyp otyrmyn. Bolashaǵyma jol ashqan, Otan qorǵaýshy retinde qalyptasýyma kómektesip, tájirıbesimen bólisken komandırlerime erekshe alǵys bildiremin, – deıdi grant ıegeri Tólendi Qalmuhambet.
Ol elimizdegi bedeldi oqý ordasynyń biri – ál-Farabı atyndaǵy Qazaq ulttyq ýnıversıtetine oqýǵa túsýdi josparlap otyr. Aıta keteıik, mundaı grantqa qol jetkizgen sarbazdar endi elimizdegi tańdaýly oqý oryndaryna ulttyq biryńǵaı testileýden ótpeı-aq túse alady.
– Jas sarbaz ásker qataryna kelgende óziniń qaı oqý ornyna túskisi keletinin kórsetip baıanat jazady. Biz ony «Srochnık 2.0» sıfrlyq platformada kórsetemiz. Bul sertıfıkat naqty mamandyqqa berilmeıdi. Erteń úıine jetkennen keıin qandaı mamandyq bar, ózderi tańdaý jasaıdy. Shekteý joq, – deıdi bólim komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Fahrıtdın Abdrahmanov.
Sarbazdarǵa beriletin sertıfıkat eki jylǵa deıin jaramdy. Osy ýaqyt ishinde talapker tańdaǵan joǵarǵy oqý ornyna baryp tirkelýi tıis. Olarǵa shákirtaqy tólenip, jataqhanadan oryn da beriledi.