Bul kórmede sandyqtyń 15-ten astam túri bar.
Megapolıs tórinen oryn tepken Ortalyq mýzeıde mýzeı qoryndaǵy sandyqtar koleksıasy negizinde «Kóneniń kózi – sandyq» kórmesi ashyldy, dep habarlaıdy Almaty-akshamy.kz
Sandyqtar jasalý materıalyna, kólemi men atqaratyn qyzmetine qaraı jaǵlan, kebeje, abaja, abdyra, ábdire, aqyret sandyq, qolsandyq, shaısandyq, aǵash sandyq, súıektelgen, oımyshty sandyq, t.b. dep atalady. Kólemi shaǵyndaý jáne neǵurlym kishkene keletin árji, bógire, bógirebas, jaǵdan, tekshesandyq degen túrleri de bar.
Atalmysh kórmege osyndaı ataýlarǵa ıe 15-ten astam sandyq túri qoıyldy. Olardyń kópshiligi Ortalyq mýzeı qoryndaǵy HH ǵasyrdy qamtıtyn jáne ár jyldary elimizdiń túrli óńirinen jınaqtalǵan sandyqtar.
«Kóneniń kózi – sandyq» kórmesiniń saltanatty ashylý rásiminde QR Memlekettik ortalyq mýzeıi dırektorynyń ǵylymı jumystar jónindegi orynbasary Ǵ.Temırton quttyqtaý sóz sóılese, Antropologıa jáne etnologıa bóliminiń aǵa ǵylymı qyzmetkeri Rústembek Shoıbekov jáne T.Júrgenov atyndaǵy Óner akademıasynyń «Keskindeme, músin jáne dızaın» fakúltetiniń «Sándik óner» kafedrasynyń oqytýshysy, aǵashty kórkemdeý óńdeý sheberi Ernazar Ánýarbekuly sandyq jasaý óneriniń ereksheligin atap ótti.
Kórme ulttyq dástúri men halqynyń mádenıetin tereń tanyǵysy keletin árbir azamatqa qundy aqparat bereri sózsiz.