Qazaqstan – kópultty memleket. Árbir ultqa óz dinı nanym-senimin ustanyp, óz tilinde sóılep, atadan balaǵa mıras bolyp kele jatqan salt-dástúrin saqtaýǵa jaǵdaı jasalǵan. Biraq qazaq topyraǵynda týyp, qazaqy ortada ósip-óngen ózge etnos ókilderiniń arasynda qazaqsha maqaldap sóılep, óleńderdi jatqa oqyp, tek qazaq tilinde sóılep júrgender kóp emes. Búgin biz qazaqshasy tap-taza Mýstafaev Anar Mehtı-ogly týraly aıtatyn bolamyz.
Almaty qalasy, Almaty jáne Jetisý oblystary boıynsha qylmystyq-atqarý júıesi departamentine qarasty №11 mekemesinde abyroıly qyzmet etip júrgen Anar Mehtı-ogly Grýzıa jerinde, Dmanınskıı aýdanynda dúnıege kelgen. Ákesi – ázirbaıjan, anasy –qazaq, Qyzylorda qalasynyń týmasy.
Almaty qalasyndaǵy Qazaq eńbek jáne áleýmettik qatynastar akademıasyn zańtaný mamandyǵy boıynsha jáne magıstratýrasyn bitirgen. Anar Mehtı-ogly qazaq tilinde bilim alǵan. Sondyqtan erkin sóıleıdi. Til turǵysynda ótken talaı jarysqa qatysyp, top jarǵan azamat. Alǵashqy eńbek jolyn óz qalaýymen qylmystyq atqarý júıesinen, ıaǵnı Almaty oblysy boıynsha LA-155/18 kolonıasynda Rejım jáne kúzet bóliminiń baqylaýshysy bolyp bastaǵan. 2015-2017 jyldar aralyǵynda LA-155/8 mekemesiniń tárbıe bóliminde tárbıeshi maman bolyp qyzmet atqardy. Odan 2017-2020 jyldary LA-155/6 túzeý mekemesinde tárbıeshi jáne teolog-maman bolyp eńbek etti. Al qazir №11 mekemesinde, ıaǵnı jasóspirimder kolonıasynda Rejım jáne kúzet bóliminiń, mekeme bastyǵynyń kezekshi kómekshisi degen abyroıly laýazymy bar.
Ádilet maıory Anar Mýstafaev bólimindegi qyzmetkerlerdiń júıeli, tyńǵylyqty, naqty jumys atqarýyna erekshe kóńil bóledi. Sondyqtan da 13 jyldyq tájirbıesi bar azamat búkil ujym aldynda aldynda bedeldi. Mekemege jańadan kelgen tyńdaýshylarǵa da tálimger retinde bilgenimen bólisip, jol kórsetip otyrady.
Temirdeı tártipke tóselgen ádilet maıory minsiz eńbegi úshin Qazaqstan polısıasynyń 30 jyldyq merekesinde QR-nyń «Polısıa» tósbelgisimen marapattalǵan.
Áriptesteri Anar Mehtı-oglynyń boıynan únemi jyly júrek, nurly aqyl, ystyq qaırat kóretininin aıtady. Úlgili otaǵasy, meıirimdi áke. Bir qyz, bir ul tárbıelep otyr. Balalary da qazaq tilinde erkin sóıleıdi. Otbasynda qazaqy salt-dástúrge de erekshe mán beriledi.
Qarapaıym baqylaýshydan mekeme bastyǵynyń kezekshi kómekshisine deıingi dárejege kóterilgen azamattyń alar asýy áli alda dep bilemiz. Almatynyń tynyshtyǵyna, qaýipsizdigine úles qosyp júrgen jigittiń ómir joly, ustanymy jastarǵa úlgi bolary sózsiz.