Qostanaı oblysy Amangeldi aýdanynyń ákimdigi «Amangeldi» týrısik kesheniniń panteonynda Saltanat Núkenovanyń aty jazylǵan eskertkish taqtanyń ornatylýyna qatysty túsinik berdi, - dep habarlaıdy Aqshamnews.kz.
"Áleýmettik jeliler men buqaralyq aqparat quraldarynda taraǵan «Saltanat Núkenova esimi jazylǵan taqta “Ulttyq jady qabyrǵasy” memorıalynda ornalasqan» degen aqparat shyndyqqa sáıkes kelmeıdi.
2020 jyldan bastap Qostanaı oblysy Amangeldi aýylynda mesenattyń bastamasymen kópfýnksıonaldy týrısik keshenniń qurylysy júrgizilip keledi.
Búgingi kúni keshen aýmaǵynda pıramıda, «Al-Gambra» kafesi, «Brazılıa» qonaq úıi, Eıfel munarasynyń, Nú-Iorktegi «Bostandyq músininiń», Meksıkadaǵy Maııa órkenıetiniń Chıchen-Isa pıramıdasynyń kóshirmeleri, balalarǵa arnalǵan sport alańshalary jáne ózge de nysandar salynǵan.
Týrısik hab aýmaǵynda «Ulttyq jady qabyrǵasy» atty memorıaldyq qabyrǵa ornalasqan. Onda tarıhı tulǵalardyń esimderi jazylǵan 296 eskertkish taqta ornatylǵan. Atalǵan memorıaldyq qabyrǵa 2024 jylǵy 23 mamyrda monýmentaldy óner nysandaryn ornatý jónindegi respýblıkalyq komısıamen kelisilgen. Qazirgi ýaqytta memorıaldyq qabyrǵa jergilikti atqarýshy organnyń balansyna berilgen.
Sonymen qatar, mesenattyń jeke bastamasymen týrısik keshen aýmaǵyndaǵy («Ulttyq jady qabyrǵasyna» qatysy joq) jeke menshik qaıyrymdylyq qoryna tıesili jabyq nysandardyń birinde tarıhı tulǵalar men oqıǵalardyń ataýlary jazylǵan birneshe ondaǵan taqta ornatylǵan. Sol taqtalardyń qatarynda Saltanat Núkenova esimi jazylǵan taqta da bar. Taǵy da atap ótemiz: bul taqtalar mesenattyń jeke bastamasymen qoıylǵan", - delingen aqparatta.
Eske sala keteıik, buǵan deıin otbasylyq zorlyq-zombylyqtan qaza tapqan Saltanat Núkenovanyń esimi Qazaqstannyń eleýli tulǵalarynyń panteonyna engizilgenin habarlaǵan edik.