Elde 8 oblys kóktemgi sý tasqyny qaýpi joǵary aımaqta tur. «Qazgıdromet» mamandarynyń boljamy osyndaı, dep habarlaıdy aqshamnews.kz 24kz-ke silteme jasap.
Tasqyn kezeńine daıyndyqtyń jaı-japsary búgin Senatta ótken Úkimet saǵatynda pysyqtaldy. Mınıstrdiń aıtýynsha, mamandar men múddeli memlekettik organdar kún saıyn qar deńgeıin, ózenderdiń jaı-kúıi men aýa raıy týraly derekterdi taldaýda. Bul qaýipti ýchaskelerdi erte anyqtap, halyqty ýaqtyly habardar etýge múmkindik beredi.
Sergeev sý qoımasy qazirdiń ózinde tolyp tur. Artyq sý bógettiń ústimen Esilge toqtaýsyz quıylýda.
Mamandar: «Bógenniń bosamaýyna kóktemgi tasqyn, jaz boıy jaýǵan jańbyr men jerasty sýlarynyń kóterilýi sebep», - deıdi. Sý qoımasy 1969 jyly salynǵan. Senatorlar jaýapty organ ókilderinen osy nysanǵa qatysty jaǵdaıdy surady.
Ásem Rahmetova, QR Parlamenti Senatynyń depýtaty: - Ádette qys aılarynda ol jerde erneýinen sý aspaıtyn. Al bıyl 5 qańtardan bastap sý arnasynan asyp tur. Aldaǵy ýaqytta bul jumysty jalǵastyra beretin bolsańyzdar Sergeev sý qoımasyndaǵy jaǵdaı qalaı bolady?
Bolat Beknıaz, QR Sý resýrstary jáne ırrıgasıa birinshi vıse-mınıstri: - Sergeev plotınasynyń óte úlken mólsherde sýdy ótkizetin múmkinshiligi bar. Byltyrǵy tasqynda ózderińiz kórdińizder, 1 metrden astam sý plotınanyń ústinen júrse de, sý qoıma soǵan shydap, ótkizdi. Qazirgi tańda ol sý qoımanyń rekonstrýksıasyn jasap jatyrmyz. Bizdiń boljam boıynsha Sergeev sý qoımasynda eshqandaı qaýip joq qazirgi tańda.
Jýyrda Reseı, Ózbekstan, Qyrǵyzstan aýmaǵynda jınalǵan qardyń qalyńdyǵy jaıynda málimetter alynady. Sınoptıkter byltyrdan beri tasqyn qaýpin boljaý ádistemelerin jaqsartqan. Qysqa jáne uzaq merzimderge taldaý jasalýda. Bıyl gıdrologıalyq monıtorıńpen qamtylǵan aımaqtardyń ınteraktıvti kartasy jańartyldy. Bul túsken málimetterdi dereý óńdeýge múmkindik beredi.
Danara Álimbaeva, «Qazgıdromet» RMK bas dırektory: - Kóktemgi sý tasqyny kezeńine arnalǵan aldyn ala boljamdy keshe ǵana barlyq memlekettik organdarǵa joldadyq. Olar tıisti sheshim qabyldaıdy. Tasqyn qaýpi joǵary aımaqtarǵa Abaı, Shyǵys Qazaqstan, Qaraǵandy, Ulytaý, Soltústik Qazaqstan, Qostanaı, Aqmola jáne Batys Qazaqstan oblystary jatady.
Sonymen qatar orta deńgeıdegi qaýipti aımaqtarǵa Jetisý, Jambyl, Túrkistan, Atyraý oblystary kiredi.
Shyńǵys Árinov, QR Tótenshe jaǵdaılar mınıstri: - Aldaǵy sý tasqyny kezeńine jedel daıyndyq maqsatynda azamattyq qorǵaý qyzmetterinen jáne jeke quramnyń jalpy sany 37 myńnan astam adam, 13 myńnan astam tehnıka, 4096 sý aıdaý jáne 640 júzý quraly bar kúshter toptamasy quryldy. Mınıstrliktiń aýmaqtyq bólimshelerinen qosymsha rezervtik toptary daıyndaldy. Jalpy mınıstrliktiń qutqarýshylary kez kelgen tótenshe jaǵdaılar men oqıǵalarǵa den qoıýǵa daıyn.
İrgege jetken apatpen erlikpen kúreskennen góri ony boldyrmaǵan tıimdi. Senator Jaqyp Asanov eger jyl saıyn tasqynnyń sebebimen emes, tek saldarymen kúrese bersek, qazyna qarjysy ortaıatynyn eske saldy.
Jaqyp Asanov, QR Parlamenti Senaty tóraǵasynyń orynbasary: - Ár kóktemdi ýaıymmen kútý bizdiń ádetimizge aınaldy. Byltyr esten ketpeıtin apatty bastan keshtik. Búginniń ózinde kóktem kelmeı jatyp Reseıdiń keı óńirinde sý tasqyny bastalýda. «Bir ǵasyrdan beri bolmaǵan jaǵdaı», - dep jatyr sınoptıkter. Shekaralas Orynbor, Orsk, Omskide sý arnasynan shyǵyp, mańaıyn basýda. Demek, ol topan sý kóp uzamaı bizge de keledi.
Bıyl da arqany keńge salýǵa bolmaıdy. Alda birqatar mańyzdy mindet tur. Sý qoımalaryn jańǵyrtý, sýarý kanaldaryn retke keltirý, ǵaryshtyq monıtorıńtiń kómegimen qaýip basym jerlerdiń kartasyn túzý, turǵyndarǵa is-qımyl algorıtmin úıretý. Múlikti saqtandyrý tetikterin ázirleý qajet. Aıtpaqshy, sońǵysy ázir tek jumys toby aıasynda pysyqtalyp jatyr.