Komısıa kezekti otyrys ótkizdi
Ortalyq referendým komısıasynyń kezekti otyrysynda 5 maýsymda ótetin referendýmǵa daıyndyq barysy men respýblıkalyq referendýmnyń qujattaryn saqtaý qaǵıdalary baıandaldy, dep habarlaıdy Almaty-akshamy.kz Baq.kz-ke silteme jasap.
«19-28 mamyr aralyǵynda daýys berý kúnine daıyndyqty uıymdastyrý máselelerin zerdeleý maqsatynda men jáne meniń áriptesterim elimizdiń 14 óńirinde boldyq. Sapar barysynda Ortalyq komısıa músheleri referendým ýchaskelerine bardy. Olardyń materıaldyq-tehnıkalyq jaraqtalýyn, múmkindigi shekteýli adamdar úshin jaǵdaıdyń jasalýyn, komısıalardyń tizimdi jasaý, azamattardy aqparattandyrý jónindegi jumysyn, jergilikti deńgeıde oqytýdyń uıymdastyrylýyn baqyladyq», – dedi Ortalyq referendým komısıasynyń tóraǵasy Nurlan Ábdirov.
Al respýblıkalyq referendým týraly zańnyń quzyretterine saı respýblıkalyq referendýmnyń qujattaryn saqtaý qaǵıdalaryn bekitý týraly daıyndalǵan qaýlyny Ortalyq referendým komısıasynyń múshesi Asylbek Smaǵulov tanystyrdy.
«Daýys berýge arnalǵan búlletenderdi mórlengen kúıinde, onyń ishinde jekelegen joıylǵan búlletenderdi sondaı-aq referendýmǵa qatysýǵa quqyǵy bar azamattardyń tizimderin jáne olarǵa qujattardy oblystyq, respýblıkalyq mańyzy bar qalalardyń jáne astananyń referendým komısıalary Ortalyq referendým komısıasyna tapsyrady. Onda referendým qorytyndylary jarıalanǵannan keıingi bir aı boıy qupıa aqparat quqynda saqtalyp, keıin joıylady», – dedi ol.