Alataý aýdanynyń «Rahat-Mádenıet» yqshamaýdanynda barlyq úıler ortalyq sý qubyry men káriz júıesine qosylady. Qazir ınjenerlik jelilerdiń edáýir bóligin tartyp qoıǵan. Óńirlik komýnıkasıalar qyzmeti uıymdastyrǵan baspasóz týry barysynda jýrnalıser osy joba boıynsha qolǵa alyp jatqan jumyspen tanysyp shyqty, dep habarlaıdy aqshamnews.kz
Aýdan ákimdigi iske asyryp jatqan joba yqshamaýdandy ortalyqtandyrylǵan sý qubyry men káriz júıesine tolyq qospaq.
Jalpy quny 10,4 mıllıard teńgeni quraıtyn jobada 131,72 shaqyrym ınjenerlik jeliler salynady. Olar 69,9 shaqyrym sý qubyry men 61,8 shaqyrym káriz júıesi. Jumysty atqarýshy jalpy merdiger — «Sapa Qurylys 2007» JSHS. Jobanyń avtorlyq qadaǵalaýyn «Qazaq sýkanalproekt» JSHS júrgizse, tehnıkalyq baqylaýdy «AMANAT ekspert» JSHS júzege asyryp jatyr.
Baspasóz týry barysynda habarlanǵandaı, daıyndyq jumysy 2023 jyldyń qazan-qarasha aılarynda bastalǵan. Qazir 49,8 shaqyrym ınjenerlik jeli tartylypty, onyń 30,3 shaqyrymy sý qubyry men 19,5 shaqyrymy káriz jelisi. Memlekettik saraptamanyń qorytyndysyna sáıkes, joba 2023 jyldyń sońyna deıin aıaqtalmaq.
«Boraldaı men Rahat-Mádenıet yqshamaýdanynda qurylys-montaj jumystary, qalalyq sý jáne káriz jelilerine qosý men joldy asfálttaý jumysy júrgizilip jatyr. Munyń bári ortasha emes, jańa qurylys. Aıgerim 1-2 jáne Terekti yqshamaýdandary sıaqty máselesi sheshilmegen aýdandar da bar. Terektige baılanysty biz osy aptada sot sheshimin kútip otyrmyz. Eger oń sheshim shyqsa, shilde aıynyń basynda qurylys-montaj jumysy bastalady. Bul jaqtaǵy sharýanyń kólemi Rahat-Mádenıettegimen birdeı. Aıgerim mıkroraıony boıynsha «Almaty Sý» kompanıasy men Energetıka basqarmasynyń sheshimin kútip otyrmyz. Alaıda, qala ákimi Darhan Satybaldynyń tapsyrmasymen bıyl barlyq yqshamaýdanda jumys bastalyp, kelesi jyly aıaqtalýy tıis ol. Bárine qarjy bólingen, endigi mindet — merdigerlerdi baqylap, kún raıyn, ýaqytty eskerip otyrý», - dedi Alataý aýdanynyń ákimi Talǵat Malybaev.
Jobanyń nátıjesinde 2 882 abonent — bul shamamen 14 000 turǵyn — alǵash ret sapaly ortalyqtandyrylǵan sý men káriz qyzmetine qol jetkizedi. Osy abonentterdiń ishinde 350-den astamyna ortalyq sý qubyry qosyldy. Bul sheshim qazirgi turmystyq qıyndyqtardy joıýǵa ǵana emes, sonymen qatar osy aýmaqtaǵy ómir súrý deńgeıin aıtarlyqtaı arttyrýǵa yqpal etpek.
Joba kóp jyldar boıy negizgi komýnaldyq qyzmetten shettetilip qalǵan turǵyndardyń ótinishine jaýap retinde qolǵa alynyp otyr. «Rahat-Mádenıet» yqshamaýdany qala ortalyǵynda ornalassa da, kóp kóshesi áli kúnge deıin ortalyqtandyrylǵan ınjenerlik jelilerge qosylmaǵan.
Baspasóz týry barysynda Alataý aýdanynyń ákimi Talǵat Malybaev «Rahat-Mádenıet» yqshamaýdanynyń qaı kóshesi sý men káriz júıesine qosylǵanyn, qaı kósheni ınjenerlik jelige qosý jumysy aıaqtalyp qalǵanyn aıtty.
«Krandy ashyp, sý bar ekenin kórsete alamyz. Mine, osy aýdandaǵy jumys qazir 100% bitti. Bul kóshelerdi biz maýsym aıynyń sońyna deıin tamamdaýdy oılastyryp otyrmyz. Qalǵanyna bir apta qaldy. Kelesi aýdandaǵysyn shilde aıynyń sońyna deıin bitirmekpiz. Taısaýyryn, Altynqorǵan, Aıpara kósheleri óte tar. Ekskavator áreń kirip, aınalyp shyǵa almaıdy. Bul jumysqa kedergi keltirip otyr. Eń qıyn ýchaskemiz de osy jer. Jalpy alǵanda, jumystyń qarqyny jaqsy. Sondyqtan bul joba keler jylǵa deıin tolyq biterine senimdimiz», — dedi Talǵat Malybaev.
«Rahat-Mádenıettegi» joba Alataý aýdanyndaǵy ınfraqurylymdy modernızasıalaý boıynsha keń aýqymdy strategıanyń bir bóligine aınaldy. Qazirgi tańda Alataý aýdany Almaty boıynsha damý qarqyny joǵary aýdannyń biri bolyp otyr.