Qytaıdaǵy elektrondy saýda alańynda qazaqstandyq ónimderge suranys artty.
Bıyl mamyr aıynda prezıdent Qasym-Jomart Toqaev kórshi elge sapary kezinde ulttyq pavılonymyzdy ashqan edi. Sapaly ónimderimiz dúken sórelerinde kóp turmaıdy. Jurt jappaı alyp ketetin kórinedi, dep habarlaıdy Almaty -akshamy. kz.
24.kz aqparatyna saı, onlaın ulttyq pavılonymyzda un, ósimdik maıy, túıe súti, shaı sıaqty 20 shaqty ónim satylady. Jergilikti turǵyndardyń qazaqstandyq taýarlarǵa degen yqylasy erekshe. JD elektrondyq saýda alańynda qazaqstandyq pavılonnyń ashylǵanyna 1,5 aıdaı boldy. Ony qurǵan qytaılyq birlestik álemdegi 500 iri kompanıanyń ishinde 46-shy orynda tur. Onlaın dúkenniń tutynýshylary 600 mıllıonnan asady.
«Qazaqstandyq pavılon ashyla salysymen taýardyń 80 paıyzy 1 saǵattyń ishinde satylyp ketti. Qazir qazaq ónimderi bólimine jazylýshylar sany 110 myńǵa jýyqtady. Biz keleshekte ol ónimderdi osy pavılonda ǵana emes kompanıamyzdyń ózge dúkenderine sata alamyz», - deıdi kompanıa basqarmasynyń tóraǵasy Chjan Szán
Birlestiktiń elektrondyq saýda alańynda 50-den astam eldiń pavılony bar. Kompanıa ókilderi ımporttyq taýarlardy satyp alǵysy keletin turǵyndar qarasy artyp kele jatqanyn aıtady. Bul taýrlardyń tabıǵı taza bolýynan deıdi mamandar.
«Bizdiń alańymyzda satylatyn qazaqstandyq ónimderdiń arasynan qurǵaq túıe súti men undy erekshe atap ótkim keledi. Qytaıda túıe súti naryǵy tez damyp keledi. 9 jyl buryn onyń kólemi 9 mıllıard ıýán edi. Bıyl 20 mıllıardtan asty. Biraq ónim tapshy. Qazaqstannan keletin túıe súti osy suranysty toltyryp jatyr. Al qazaqstandyq un dámdi ári ekologıalyq taza dep sanalady»,- deıdi JD Group kompanıasynyń vıse-prezıdenti E. Veı.
Qytaıda elektrondy saýda naryǵy 31 trıllıon ıýánnnan asady. Bul saladaǵy yntymaqtastyqty keńeıtý eki el arasyndaǵy taýar aınalymyn ulǵaıtýǵa múmkindik beredi.