Dúbirli dodada elimizdiń atynan 78 sportshy baq synaıdy
AQSH-tyń Leık-Plesıd qalasynda ótetin 2023 jylǵy Qysqy Ýnıversıadanyń saltanatty ashylýy qaı ýaqytta bastalatyny belgili boldy, dep habarlaıdy Almaty-akshamy.kz QazAqparatqa silteme jasap.
XXX Qysqy Ýnıversıadanyń resmı ashylý saltanaty elorda ýaqytymen 05:50-ge belgilengen. Atalǵan shara «Qazsport» telearnasynan tikeleı efırde kórsetiledi.
Dúbirli dodada elimizdiń atynan 78 sportshy baq synaıdy. Olar shańǵymen jarysý, short-trek, bıatlon, mánerlep syrǵanaý, kónkımen júgirý, snoýbord, taý shańǵysy sporty, tuǵyrdan sekirý, qossaıys, shaıbaly hokeıden jarys jolyna shyǵady.
Qazirge deıin qazaqstandyq sportshylar barlyǵy 107 medalǵa ıe boldy. Olardyń 20-y altyn, 40-y kúmis, 47-i qola medal. Bul jóninen jalpy komandalyq esepte 107 memlekettiń arasynda 35-orynda tur. Kósh basynda AQSH, Qytaı, Reseı sportshylary keledi.
Buǵan deıingi ýnıversıadalarda qazaqstandyq stýdentter 2017 jyly joǵary nátıje kórsetti. Elimizdiń Almaty qalasynda ótken básekede olar 11 altyn, 8 kúmis pen 17 qola oljalady. Nátıjesinde barlyǵy 36 medalmen Qazaqstan jalpy komandalyq esepte ekinshi oryn aldy.
Ýnıversıada oıyndarynyń tarıhy 1924 jyldan bastaý alady. Ol 1959 jylǵa deıin búkilálemdik ýnıversıtet oıyndary atalyp keldi. 1959 jyldan bastap ýnıversıada bolyp tanyldy.
Dúbirli dodany tikeleı efırde kórsetý mindetin «Qazsport» telearnasy óz mindetine alyp otyr.