«Qalalarǵa qurylys kodeksi emes, qala qurylysy kodeksi kerek» deıdi basqosýǵa qatysqan sarapshylar.
«Almatybasjospar» ǴZI alańynda «Sáýlet, qala qurylysy jáne qurylys qyzmetiniń normatıvtik-quqyqtyq salasyndaǵy sońǵy ózgerister» taqyrybymen ótken «dóńgelek ústel» úlgisindegi jıynda qala qurylysy salasynyń sarapshylary qurylys kodeksiniń olqylyqtaryn talqylap, oı-pikir, usynystaryn ortaǵa saldy. Jıyndy júrgizýshi Qazaqstan qala qurylysshylary odaǵynyń prezıdenti, sáýletshi Lúbov Nysanbaeva atalǵan kodeks jobasynda aýmaqtyq josparlaý, qala qurylysyn aımaqtarǵa bólý jáne aýmaqty josparlaý negizinde aýmaqtyń keshendi ári turaqty damýyn qamtamasyz etýge baılanysty qala qurylysy qyzmetiniń mindeti men qaǵıdaty joqtyǵyn alǵa tartty.
«Qala qurylysy blogy basymdyqqa ıe bolýǵa tıis. Kodekste kóliktik, áleýmettik, ınjenerlik qurylymdy jobalaýdyń barlyq qaǵıdaty, tarıhı mura, jasyl qańqa, ekologıalyq jáne seısmıkalyq qaýipsizdikti saqtaý basymdyqtary, jobalaý men iske asyrý kezinde jurtshylyqpen, eldimeken turǵyndarymen ózara is-qımylda jazylýy qajet», -- dep atap aıtty L.Nysanbaeva.
«...Buǵan qosa, kodekstiń ataýyn «qurylys kodeksine» ózgertý onyń qoldanylý aıasyn taryltady. Óıtkeni «qurylys» termıni sáýlet jáne qala qurylysy salasyn qamtymaıdy» deıdi sarapshylar. Bıylǵy 17 qańtarda QR Parlament depýtattary QR Qurylys kodeksi jumysyn qabyldaǵan bolatyn. Kodeks pen ilespe zańdardyń jobasy sáýlet pen qala qurylysynyń progresıvti jáne júıeli tetikterin belgileýge, qurylystyń barlyq kezeńin onlaın rejımde baqylaýǵa múmkindik beretin e-qurylys aqparattyq júıesin engizýge baǵyttalǵan. Desek te, sarapshylardyń pikirinshe, kodeks aıtarlyqtaı jetildirýdi qajet etedi.
Almaty qalasy kásipkerler palatasynyń dırektory, qalalyq máslıhattyń qurylys, sáýlet, ýrbanıstıka jáne jer qatynastary jónindegi turaqty komısıasynyń tóraǵasy Nursultan Shoqanov qala qurylysy kodeksiniń qalalar ınfraqurylymy men tynys-tirshiligin damytý ári jaqsartýǵa negiz ekenin, sonymen qatar qoǵam men bıznestiń kóptegen múddesin qozǵaıtynyn atap ótti.
«Bul jaǵdaıda qujatpen jumys isteý qıyndyq týǵyzady. Sondyqtan, mańyzdy qujat kásibı qaýymdastyq, naryq sýbektileri men jalpy jurtshylyqtyń talqysyna túsip, ony tolyq qaıta óńdeý talap etiledi. Tıimdi jumys isteý úshin qala josparlaýshylaryna, sáýletshilerge, dızaınerlerge, sarapshylar men qurylysshylarǵa naqty algorıtm men bilikti zań qajet. Degenmen, elimizdegi qurylys salasy ondaǵan qoldanystaǵy zań men zańǵa táýeldi aktiler jıyntyǵynan bıik bolatyn naqty retteýshi tetikke ıe emes», -- deıdi N.Shoqanov.