Ulttyq oıyndar – óskeleń urpaqty úılesimdi tárbıeleýdiń ajyramas bóligi. Naýryznama onkúndigi aıasynda 20 naýryz «Ulttyq sport» kúni dep belgilendi. Bul kúni mektep oqýshylary ulttyq sport túrlerinen saıysqa túsip, ulttyq qundylyqtar dáripteldi, dep habarlaıdy almaty-akshamy.kz.
Jetisý aýdany №110 mektep-gımnazıasynda 7-8 synyp oqýshylary arqan tartý, asyq atý, tymaq urý, qol kúres, buqa tartys sıaqty ulttyq sport túrlerinen synǵa tústi. Sharaǵa 40-qa jýyq oqýshy qatysyp, bilektiler arasynan shyn myqtyny anyqtady. Jeńimpazdarǵa kýboktar men arnaıy dıplomdar tabys etildi.
Elimizde ulttyq sport túrleriniń ishindegi eń tanymaly – toǵyzqumalaq. Adamnyń oılaý qabiletin damytyp, tapqyrlyqqa tárbıeleıtin zıatkerlik oıyn túrinen №7 Oqýshylar úıinde «Ulystyń Uly kúnine – ulttyq oıyn» oqýshylar arasynda qalalyq jarys ótti. Saıysqa qalamyzdyń 8 aýdanynan 80 oqýshy qatysty. Júzden júırik shyqqan jeńimpazdar arnaıy dıplomdarmen, medaldarmen marapattaldy.
Búginde ulttyq sport túrleri tez tanymal bolyp, oqshylardyń da qyzyǵýshylyǵyn oıatýda. Osy oraıda Áýezov aýdanyndaǵy №116 mektepte de oqýshylar ulttyq sport túrlerinen ózara synǵa tústi. Oqýshylar arqan tartý, asyq atý, tymaq urý, buqa tartys jáne toǵyzqumalaq sıaqty ulttyq sport túrlerinen saıysyp, ulttyq oıynnyń qundylyǵyn dáriptedi.
Sonymen qatar Almaty qalasynyń barlyq bilim berý uıymdarynda ulttyq oıyndardan mektepishilik jarystar ótkizildi. Mundaǵy maqsat – qazaq halqynyń ulttyq oıyndary arqyly oqýshylardyń boıynda ulttyq biregeılikti saqtaý, oqýshylardyń patrıottyq sezimderin oıatyp, salt-dástúrimizdi saqtaı bilýge tárbıeleý.