QR Premer-Mınıstri Oljas Bektenov qazaqstandyqtardy Naýryz meıramymen quttyqtady, dep habarlaıdy almaty-akshamy.kz.
«Qurmetti qazaqstandyqtar!
Sizderdi Ulystyń uly kúni – Naýryz meıramymen shyn júrekten quttyqtaımyn!
Tirshilik ataýlyny túletip, jer-jahanǵa izgilik nuryn sebetin Áz-Naýryzdy elimiz darhan peıilmen, jańasha mazmunmen atap ótýde.
Baǵzydan yrys pen berekeniń altyn arqaýy, molshylyq pen ıgiliktiń qaınar bastaýy bolǵan ulyq mereke – halqymyzdy muratqa jetkizer myzǵymas birliktiń, irgesi berik, eńsesi bıik eldiktiń jarshysyna aınaldy. Jańarǵan jyl kemel keleshekten úkili úmit kútken elimiz úshin jasampaz isterge ári tabysqa toly bolǵaı. Ár shańyraqtyń yrzyq-nesibesi artyp, arman-maqsattary oryndalsyn.
Rýhanı qundylyqtarymyzdy dáripteıtin Naýryz merekesi qutty bolsyn. Qashanda otbasylaryńyzdan shattyq pen molshylyq ketpesin! Ulys oń, aq mol bolsyn!», - dedi Úkimet basshysy.