Qarýly Kúshterdiń qyzmetin jetildirý joldary talqylandy
Qorǵanys vedomstvosynyń basshysy general-polkovnık Rýslan Jaqsylyqov oqý-ádistemelik jıyndary sheńberinde ásker túrleriniń bas qolbasshylarymen, óńirlik qolbasshylyqtar men ásker tekteriniń qolbasshylarymen, áskerı bólimder men quramalardyń komandırlerimen keńes ótkizdi, dep habarlaıdy Almaty-akshamy.kz.
Óristetilgen komandalyq pýnktti tekserý barysynda mınıstr qolbasshylardyń, quramalar men batalón komandırleriniń basqarý pýnktterin uıymdastyrýda osyndaı tasadaǵy oryndardyń ózektiligin atap ótti.
– Bekindirilgen basqarý pýnktteri – qazirgi zamanǵy qarýly qaqtyǵystardyń standarty. Joǵary qaýipsizdik bólimshelermen jumystyń tıimdiligin arttyrady, – dedi ol.
Komandalyq qurammen ótken kezdesýde mınıstr áskerlerdiń jaýyngerlik ázirligin, jaýyngerlik qabilettiligi men utqyrlyǵyn arttyrýǵa baǵyttalǵan Qarýly Kúshterdiń qyzmetin jetildirý joldaryn talqylady.
Oqý-ádistemelik jıyndar sheńberinde qatysýshylar jaýyngerlik is-qımyldardy júrgizý barysynda áskerı quralymdar shtabtarynyń qyzmet algorıtmimen jáne jedel-taktıkalyq býynnyń basqarý organdary arasyndaǵy baılanysty uıymdastyrýmen tanysty.
Jıynǵa qatysýshylar áskerı qyzmetshilerdi BUU bitimgershilik mısıasyn oryndaýǵa daıyndaý máselelerin talqylap, HATO standarttaryna sáıkes shtab jumysynyń uıymdastyrylýymen tanysty.
Ótkizilgen sabaqtar komandırlerge áskerı bólimder men quramalarda jaýyngerlik daıarlyqty uıymdastyrý, ár túrli jaýyngerlik is-qımyldarda áskerlerdi basqarý daǵdylaryn alýǵa múmkindik beredi. Olar komandalyq quramnyń aldynda turǵan máseleler men mindetterdiń ózekti spektri boıynsha biryńǵaı oqý-ádistemelik bazany ázirleýge baǵyttalǵan.
Basshylyq quramnyń jıyndary Qorǵanys mınıstriniń qolbasshylyǵymen ótetin kóshpeli áskerı alqa jumysymen aıaqtalmaq. Onda Qarýly kúshterdiń qysqy oqý kezeńindegi qyzmetiniń qorytyndylary shyǵarylyp, kelesi kezeńge mindetter qoıylady.