Qonaev qalasynyń turǵyndary masanyń kóptiginen dalaǵa shyǵýdan qalǵan
«Juqpaly aýrý taraýy múmkin». Osylaı degen Qonaev qalasynyń turǵyndary masa shaǵyp, alergıaǵa shaldyǵyp jatqanyn aıtady. Olar jaǵymsyz shirkeılerdiń túri jyl sanap ósip, kólemi de ulǵaıyp barady dep alańdaıdy. Onyń ústine shirkeıdiń shaqqan jeri ońaı jazylmaı, tyrtyq bolyp qalatyn kórinedi, dep habarlaıdy Almaty-akshamy.kz Almaty.tv-ge silteme jasap.
Masadan mazam qashty degen Marjan Jaqupova qazir densaýlyǵynyń jıi syr berip júrgenin aıtady. Shyrqyn alǵan shirkeı shaqqan saıyn alergıaǵa aınalyp, denesi bórtip ketetin kórinedi. Sondaı-aq turǵyndar masadan juqpaly aýrý taraı ma dep qorqady.
– Meniń kishkentaıymdy talap tastaǵan. Juǵatyn sıaqty. Olar maldyń da qanyn sorady ǵoı, – dedi qala turǵyny Gúlnaz Ospanova.
Jyldan-jylǵa jaǵdaıdyń nasharlaǵanyn kórgen el, sanıtarlyq tazalaý mamandary baqylaýdy kúsheıtýi tıis dep sanaıdy. Óıtkeni bıylǵy dezınfeksıalaý jumysy tym baıaý jasalypty.
– Meniń ulymnyń da alergıasy bar. Basyn qyp-qyzyl shaǵyp tastaǵan. Úsh jyl boldy masa ulǵaıyp kele jatyr, – dedi qala turǵyny Marjan Ateıeva.
Atalǵan qalada alpys jasandy sý qoımasy bar. Sanıtarlyq baqylaý mamandary olardy nazarda ustaıdy.
– Qapshaǵaı sý qoımasynyń jaǵalaýynda ornalasqandyqtan kóktem mezgilinen bastap, jaz aıynda osyndaı másele bar. Qonaev qalasynyń sanıtarlyq stansıasynyń kómegi arqyly jaǵajaılardy ýlaý jumysyn júrgizdi. Qazir olar ekinshi etapyn aıaqtaǵan. Osy qalanyń ishin jáne kóshelerin, kópqabatty úılerdiń jertólesin ýlaý jumystary júrgizilip jatyr, – dedi TÚKSH, Jolaýshylar kóligi, avtomobıl joldary jáne turǵyn úı ınspeksıasy bólimi basshysynyń orynbasary Asqat Jeksenbekov.
Dárileý jumystaryna byltyr 10 mıllıon bólinse, bıyl 40 mıllıonǵa deıin qarajat jumsalmaq. Endi qala ǵana emes, turǵyn úılerdiń jertólesin dárileý isi de qamtylady. Alaıda jergilikti jurt, jasalyp jatqan jumysty baıqamaǵanyn aıtady.
– Tórt jyl boldy kóship kelgeli, shynymdy aıtaıyn, zalalsyzdandyrý jumysyn baıqamadym. Ústi-basymyz qyshyp, jara bolady, – dedi qala turǵyny Torǵyn Anıatova.
– Úsh merdiger uıym jumys istep jatyr. Toǵyz tehnıka onyń ishinde traktor jáne 15-ke jýyq túrli tehnıka bar. Otyzǵa jýyq maman jumys isteýde, – dedi TÚKSH, Jolaýshylar kóligi, avtomobıl joldary jáne turǵyn úı ınspeksıasy bólimi basshysynyń orynbasary Asqat Jeksenbekov.
Jergilikti bılik masanyń kenet kóbeıýin tabıǵı faktor dep baǵa berdi. Óıtkeni qalanyń ózi Qapshaǵaı sý qoımasynyń mańynda ornalasqan. Alaıda qoldan kelgen qyzmetti jasap jatqanyna sendirdi.