Áleýmettik jelilerde keńinen taraǵan «qazdan qashqan bala» vıdeosynyń keıipkeri – úsh jasar Kereı Mahambetuly kútpegen syılyqqa ıe boldy.
Aqtóbe qalasyndaǵy «Aýyl» partıasy fılıalynyń ókilderi kishkentaı Kereıge 100 qaz tartý etti, - dep habarlaıdy Aqshamnews.kz.
Jelide vırýsqa aınalǵan beınejazba búginde 200 mıllıonnan astam qaralym jınaǵan. Tipti aty álemge tanymal amerıkalyq reper Snoop Dogg ta bul vıdeony óz paraqshasynda bólisip, mıllıondaǵan jazylýshysyna usynǵan.
Jeli juldyzy týraly saıtymyzda buǵan deıin de jazǵan edik.
Kereı Aqtóbe qalasyndaǵy Kúnshýaq shaǵynaýdanynda turady. Ákesi — dene shynyqtyrý pániniń muǵalimi. Otbasy mal sharýashylyǵymen aınalysady: jylqy, ponı jáne qaz ustaıdy.
Alaıda jeli qoldanýshylary bul jaǵdaıǵa erekshe reaksıa bildirdi. Kópshilik ázil aralas pikir qaldyryp jatyr:
«Qazdan qashqan balaǵa taǵy da qaz syılaǵany qyzyq eken»,
«Neden qoryqsań, soǵan tutylasyń deıdi ǵoı»,
«Júz jylqynyń aldyna túsip júgirsem be eken?..»
Kereıdiń qazdan qashqan sáti kúlki men yqylasqa toly reaksıalar týdyrǵanymen, elge tanymal bolýymen birge osyndaı tosyn syıǵa da sebep boldy.