Almaty ákimi Darhan Satybaldy jumys sapary aıasynda «Alataý Jaryq Kompanıasyna» bardy, - dep habarlaıdy Aqshamnews.kz.
Atalǵan kompanıa – Almaty men Almaty oblysyndaǵy 4 mıllıonǵa jýyq tutynýshyny elektr energıasymen qamtıtyn eń iri energıa taratýshy uıym.
Almaty ákimi Darhan Satybaldyǵa óńirdiń energetıkalyq ınfraqurylymyn damytýdaǵy kásiporynnyń qyzmetin, júzege asyrylyp jatqan jobalardy jáne strategıalyq josparlardy «Alataý Jaryq Kompanıasy» AQ basqarma tóraǵasy Abaı Asylov tanystyrdy.
Sapar barysynda qala ákimi kásiporynnyń óndiristik bólimshelerin aralap, elektr jabdyqtaryn jóndeý sehyn, dıagnostıkalyq qyzmetti jáne apattyq jaǵdaıdy jedel joıýǵa arnalǵan zamanaýı arnaıy tehnıkany kórdi.
Sondaı-aq sońǵy jyldardaǵy ınvestısıalyq baǵdarlamanyń qorytyndylary talqylandy. Onyń aıasynda 344 shaqyrymnan astam kabeldik jeli salyndy, 129 transformatorlyq qosalqy beket jańǵyrtyldy, 20 shaqyrymǵa jýyq áýe jelisi jańartyldy jáne jańa elektr nysandary paıdalanýǵa berildi. 2025 jyly 115 shaqyrymnan astam kabeldik jeli salý, 21 qosalqy beketti jańǵyrtý jáne 15 transformatorlyq qosalqy beketti zamanaýı keshendi-bloktyq úlgige aýystyrý josparlanyp otyr.
Darhan Satybaldynyń aıtýynsha, senimdi ári úzdiksiz elektrmen jabdyqtaý – almatylyqtardyń jaıly ómir súrýi men qalanyń turaqty ekonomıkalyq ósiminiń basty sharty.
Sapar qorytyndysy boıynsha ákim birqatar tapsyrma berdi: eskirgen kabeldik jeliler men qosalqy beketterdi jańǵyrtý qarqynyn jedeldetý, halyq tyǵyz ornalasqan aýdandarǵa basa nazar aýdara otyryp, kúzgi-qysqy kezeńge daıyndyqty kúsheıtý. Sonymen qatar, Darhan Satybaldy AJK basshylyǵyna jelilerdi baqylaý men basqarýdyń tıimdiligin arttyrý úshin sıfrlyq tehnologıalardy engizýdi, apattyq jaǵdaılarda halyqty jedel aqparattandyrý maqsatynda ákimdikpen ózara baılanysty kúsheıtýdi tapsyrdy.
Qala basshysy jóndeý jumystarynyń sapasyn arttyrý jáne qaıta qurý kestesin qatań saqtaý qajettigin atap ótip, kez kelgen kidiris turǵyndardyń jaılylyǵyna tikeleı áser etetinin aıtty.