Қаздан қашқан үш жасар Керей Махамбетұлы аз уақыт ішінде әлем жұлдызына айналды. Оның видеосы тіпті америкалық рэпер Snoop Dogg репост жасап, желіні шулатты. Аqshamnews.kz тілшісі жұлдыздың әкесімен сұхбаттасты.
Керей қалай жұлдызға айналды?
Керейдің әкесі Махамбеттің айтуынша, бәрі бір сәтте болған оқиға.
"Құлынға жем беріп келе жатқанбыз. Балам артта қалып қойды. Қаздар оның қолындағы шелекті тамақ деп ойлап, соңынан жүгірген. Ал ол қорқып қаша барды. Сол сәтті видеоға түсіріп, 9 тамызда желіге салған едім. Бір аптада-ақ 100 миллион қаралымға жетті. Қазір Instagram-да 150 миллионға, ал TikTok-та 50 миллионға жуықтады", – дейді әкесі.
Желі қолданушылары кішкентай Керейді "қаз қуған бала" деп атап кеткен. Шетелдіктер де, өзге қазақтар да балаға тәнті болып, пікір қалдырып жатыр. Видео 12 миллион лайк пен 55 мың пікір жинап үлгерген.
Керей кім?
Үш жастағы Керей Ақтөбедегі Күншуақ шағынауданында тұрады. Балабақшаға барып жүр. Әкесі - мектептегі дене шынықтыру пәнінің мұғалімі, ал үйінде жылқы, қаз, пони бағылады. Балапан кезінен жан-жануардың ортасында өскен Керей негізі қаздан қорықпайды екен. Бірақ сол күні артынан қуалаған қаздың арқасында жұлдызға айналды.
Керейдің екі бауыры бар. Әкесі балаларының бейнежазбасын жиі түсіріп, әлеуметтік желіге салып жүреді.
"Енді әлеуметтік желіні кәсіби түрде дамытқым келеді", – дейді ол.
Әкесінің айтуынша, әлемдік рэпер репост жасаған соң, оған жазып, видеоның түпнұсқасын сұрайтындар көбейген.
"Оның 88 миллион оқырманы бар. Әлемнің түкпір-түкпірінен видеоның түпнұсқасын ақшаға сатып алуды сұрап жазып жатыр. Құжаттар да жіберіп жатыр, бірақ оны түгел аударып, түсіну керек", – деді ол.
Алғашқы ұсыныстар
Видеодан кейін Керейге алғашқы ұсыныстар да түсіпті.
"Қолындағы шелекті көрдіңіз бе? Сол компания 75 литр өнім берді. Басқа ұсыныстар әзірге түскен жоқ", – дейді әкесі күліп.
Қазақтың кішкентай атқұмары
Керей атқа мінуді ерекше жақсы көреді.
"Кішкентайынан жылқыға әуес. Жануармен бірге өскен соң, табиғатқа жақын", – дейді әкесі.
Кішкентай ғана бір сәт миллиондаған адамның көңілін көтерді. Ақтөбенің шағынауданынан басталған оқиға бүгінде бүкіл әлемге тарады.
"Туған-туыс, достар, тіпті дүкендегілер де танып жатыр. Базарға барғанда "бұл қаздан қашқан бала емес пе?" деп жатыр", - дейді Махамбет мырза.