Ol – bir emes, bes emes, on tórt ret ana atanǵan áıel. Bar ǵumyryn urpaǵyna arnaǵan asyl jar, aıaýly ana. Jetisý oblysy, Kerbulaq aýdany, Saryózek kentinde Gúlnaz Shákenova esimdi ana on tórt perzentti dúnıege ákelip, solardyń árqaısyna meıirimin, ýaqytyn, ómirin arnap keledi. Qyzyǵy otbasynda egiz, úshemder joq. Kóp balaly ana Aqshamnews.kz tilshisine analar kúnine oraı on tórt balanyń anasy bolýdyń qandaı sezim ekenin áńgimelep berdi.
Gúlnaz Shákenova - Jetisý oblysy, Kerbulaq aýdany, Saryózek kentinde 1979 jyly dúnıege kelgen. Kóp balaly ana ózi de 10 bala tárbıelengen úlken áýletten shyqqan. Qazir 10 qyz, 4 uldyń anasy, 9 nemereniń apasyna aınalǵan aıaýly jar.
Kóp balaly ananyń bir kúni qalaı ótedi?
Gúlnaz Shákenova dúkende satýshy bolyp jumys isteıdi. Bala tárbıesine de, jumysyna da úlgerip júrgen ol kóp balaly otbasy bolýdyń qıyn da qyzyq tustary jaıly jáne óziniń bir kúni qalaı ótetinin áńgimelep berdi.
«Men 1995 jyly alǵash ana atanyp, tuńǵysh ulymdy dúnıege ákeldim. Balalarymnyń arasy 2-3 jyldan bolyp, 2008 jyly jetinshi balamdy bosandym. Sol jyly altyn alqa alyp, resmı túrde kóp balaly ana boldyq. Al on tórtinshi balamdy 2021 jyly ómirge ákeldim. Úlken ulym men úsh qyzym otbasyn quryp, úbirli-shúbirli bolyp otyr» deıdi ol.
Gúlnaz hanymnyń aıtýynsha, ár ýaqytty tıimdi jumsasań bárine úlgerýge bolady.
«Meniń kúnim tańerteńnen kúıeýimniń, balalarymnyń tamaǵy dep oıanýdan bastalady. Olardy sabaqqa, balabaqshasyna jiberip, basqa da úı sharýasyna úlgeremin. Tús bolsa túski tamaqtyń qamy deımiz. Tústen keıin kishi balalarymdy bir uıyqtatyp alamyn. Balalardyń úı tapsyrmalaryna da ýaqyt bólý kerek. Sonan soń keshki tamaqqa kirisemiz. Senbi-jeksenbi bolsa úıdiń kúıbeleń tirligi kútip turady» deıdi Gúlnaz Shákenova.
«Bári qarsy bolǵanda kúıeýim qoldaý bildirdi»
Gúlnaz Shákenova sábıli bolý jolynda túrli qıyndyqtar bolǵanyn aıtty. Jaqyndary tarapynan ony túsinbeı, túrli sózder aıtqandar da tabylǵan.
«Ana bolý – úlken baqyt qoı. Dese de bizge «ózińdi oıla, osy baladan keıin toqtańdar» degen sıaqty sózder de aıtyldy. Týǵan-týystar arasynda bizdi túsinbegender de boldy. Alaıda bári qarsy bolǵanda kúıeýim qoldaý bildirdi. «Bala degen baqyt. Allanyń bergen syıy. Odan eshqashan bas tartýǵa bolmaıdy. Balany baǵatyn olar emes, biz ǵoı. Esh muńaıma, ár bala óz nesibesimen keledi» dep meni qoldap otyrdy» deıdi Gúlnaz hanym.
«Ár bala – ózinshe bir tulǵa»
Kóp balaly otbasynda otbasy shyǵyndary da bir tóbe áńgime. Ár bala óz nesibesimen bolady desek te, olardyń keleshegi jeke ınvestısıany talap etedi. Gúlnaz hanym, osy tusta bala tárbıesindegi materıaldyq jáne moraldyq kóńil bólýge qalaı úlgeretinin aıtyp berdi.
«Ár bala ózinshe bir tulǵa ǵoı. Árqaısynyń minezi ár túrli. Olarǵa jeke-jeke kóńil bólip, tilin taýyp suraǵanyn alyp berip otyrýǵa tyrysamyz. Ásirese jasyratyny joq mektep jasyndaǵy balalarymyzǵa kóbirek qarjylaı kóńil bólý kerek bolady. Qatarynan qalmasyn dep qalaǵanyn, suraǵandaryn alyp berýge tyrysamyz. Bolmaı jatsa, durystap túsindirip otyramyz» deıdi kóp balaly ana.
«Memleketke týǵan balańdy mindetsiný – durys emes»
- Bala tárbıesinde ustanatyn basty qaǵıdańyz qandaı?
- Balalarymdy únemi meıirimdilikke, izettilikke, kishipeıildikke baýlyp otyramyn. Árıne kóp balaly ana bolý ońaı nárse emes. Ár balaǵa kóńil bólip, durys tárbıe berýimiz kerek. Dese de, kóp adamǵa berilmeı jatqan ana bolý degen úlken baqytty túsine bilip, ony baǵalap, ár balaǵa jetkilikti tárbıe berý alǵashqy mindetimiz»
Gúlnaz Shákenova memlekettiń kóp balaly analarǵa jasap otyrǵan jaǵdaıyna rıza ekenin aıtty. Onyń sózinshe, ár ana balany el úshin emes, áýeli ózi úshin ómirge ákeledi.
«Memleket tarapynan kóp balaly analarǵa jasalǵan jaǵdaıǵa kóńilim tolady. Altyn alqamdy da, járdemaqymdy da alyp otyrmyn. Ár ana dúnıege bala ákelse ózi úshin, otbasy úshin ákeledi. Memleket oǵan eshteńe berýge mindetti emes. Sol sebepti qısynsyz dúnıeler surap, qazaqtyń sanyn kóbeıtip jatyrmyz dep mindetsiný - durys emes sekildi. Eń bastysy sol dúnıege ákelgen balalaryńa durys tárbıe berip, ósirip, jetildirip, solardyń qyzyǵyna toımaı júrgeniń - naǵyz baqyt» deıdi Gúlnaz Shákenova.
Eske salaıyq, elimizde mamyr aıynyń ekinshi jeksenbisi analar kúni atalyp ótedi. Bul ataýly datany Úkimet 2023 jyly maýsymda mereke kúntizbesine sáıkes qosymshada bekitip, oǵan qol qoıdy.