Búgin – 11 mamyr, mamyr aıynyń ekinshi jeksenbisi, elimizde eń meıirimge toly, eń júrekke jaqyn merekelerdiń biri — Analar kúni atalyp ótýde.
Osyǵan oraı Almaty qalasynyń jastary «Anaǵa taǵzym – Anaǵa qurmet» atty onlaın-chellendjdi bastap, áleýmettik jelilerde shynaıy alǵys pen ystyq yqylastaryn bildirip jatyr, dep habarlaıdy aqshamnews.kz
Atalǵan chellendj ananyń meıirimi men mahabbatyna, tózimi men danalyǵyna degen alǵystyń kórinisine aınaldy. Qatysýshylar qysqa Reels/TikTok vıdeolardy, arhıvtik fotosýretter men storısterdi jarıalap, anasynyń ómir jolyndaǵy rólin, qıyn sátterde demeý bolǵanyn, ómirlik baǵyt siltegenin eske alýda. Kópshilik anadan alǵan tálim-tárbıeniń – ózin-ózi damytý, ózgege kómektesý, moıymaý sekildi qundylyqtardyń – búgingi ómirine úlken áser etkenin atap ótýde.
Posttar #AlgysAnama #SpasiboMame #AnagaQurmet #DenMaterı mynadaı heshtegtermen jarıalanyp,
bul ortaq heshtegter analarǵa arnalǵan myńdaǵan júrekjardy jazbalardy bir arnaǵa toǵystyryp otyr.
Chellendjge belgili blogerler, ártister, sportshylar men qoǵam qaıratkerleri belsene qatysyp, aksıanyń mán-mańyzyn arttyrdy. Olar jastardy analardy tek bir kúnde ǵana emes, kún saıyn qadirleýge, qurmet kórsetýge shaqyrdy.
«Anam – meniń ishki baǵdarshamym. Qıyn sátterde aıtqan sózderi áli kúnge deıin sanamda jańǵyryp turady. Búgingi jetistikterim – sonyń nátıjesi», – deıdi chellendjge qatysýshy jas kásipker Nurbek Serıkbaev.
«Anaǵa taǵzym – Anaǵa qurmet» — jaı ǵana onlaın-aksıa emes. Bul – urpaqtar arasyn jalǵaıtyn, qoǵamnyń rýhanı irgetasyn qalyptastyratyn shynaıy bastama. Jyldam ózgerip jatqan sıfrlyq zamanda osyndaı júrekten shyqqan sharalar adamdy óz túp-tamyryna, adamı qundylyqtarǵa qaıta bet burǵyzady.
«Oqýǵa túse almaı, bar úmitim úzilip, ómirge renjip júrgende, anam: «Seniń kezegiń keledi» dep senim syılady. Qazir men grantpen oqyp júrmin jáne sol kezde aıtqan anamnyń sózderiniń qandaı mańyzdy bolǵanyn túsindim», – deıdi stýdent Arýjan Kanapıanova.
Almaty jastary osy erekshe kúni anańyzǵa degen alǵysyńyzdy bildirip, júrekjardy estelikterińizben bólisip, chellendjge qosylýǵa shaqyrady.