16 mıllıon qazaqstandyqtyń aty-jónimen qatar, jeke kontaktisi men JSN derekteri jelige taraǵan, dep habarlaıdy aqshamnews.kz
SexuriXy.kz telegram arnasynyń málimetinshe, másele arhıv derekterinde bolyp otyr. Taraǵan derekterdiń arasynda azamattardyń aty-jóni, týǵan kúni, ulty, jynysy, JSN nómiri, meken-jaıy bar. Jalpy alǵanda jelige 15,8 mıllıon JSN, 16 mıllıon telefon nómiri taraǵan.
Mamandardyń aldyn-ala boljamy boıynsha meken-jaı baǵanynda stomatologıa, emhana, salyq komıteti, ýnıversıtet jáne basqa uıymdardyń meken-jaılary jıi kezdesedi. Bul mynany kórsetýi múmkin:
Jalpyǵa ortaq/jartylaı ashyq API arqyly derekterdi jappaı jarıalaý;
Roorly configured qyzmetterin id arqyly aty-jónin/JSN /telefondy qaıtaratyn serverdi buzý;
Integrasıalyq júıede qate derekter kórsetilgen.
Byltyr shildede Kıbershabýyldardy taldaý jáne zertteý ortalyǵy Qazaqstan azamattarynyń jeke derekteri taǵy da tarap ketkenin aıtqan. Ortalyq Telegram messendjerinde qoldanýshy BreachForums atty hakerler forýmyndaǵy derektiń bárin jelige jarıa etkenin málimdegen.
Olardyń qatarynan Spark atty kólik-logıstıka kompanıasynyń derekteri, Shákárim ýnıversıteti stýdentteri men talapkerleriniń deregi, 2022 jylǵy 24 maýsymdaǵy B2B 2GIS Qazaqstan málimetteri, Yandex Food pen 2021 jylǵy Fonbet-tiń Qazaqstan men Reseıdegi paıdalanýshylarynyń derekteri tabylǵan.
Qazaqstanda jeke derekterdiń qorǵalmaǵany jıi sóz bolady. Buǵan deıin Qazaqstannyń memlekettik tehnıkalyq qyzmeti Zaimer.kz mıkroqarjy uıymynda 2 mln klıenttiń jeke deregi «qoldy bolǵanyn» habarlaǵan. Sol ýaqytta kompanıa serverine shabýyl jasalǵan, azamattardyń jeke derekteri (aty-jóni, elektron jáshigi, jeke qujatynyń nómiri, jumys orny, mekenjaıy, bank esepshotynyń nómiri) telegramǵa jarıalanyp ketkeni aıtylǵan.