Keıíngí kezderí áleumettík jelíde balalar arasynda “Labubu” atty oıynshyq trendke aınaldy. Túr-sıpaty jaǵynan súıkímsíz, típtí keıbír eresekter úshín qorqynyshty kórínetín būl oıynshyqty balabaqshadaǵy búldírshínnen bastap, mektep jasyndaǵy balalarǵa deıín jantalasa sūrap jatyr. Balalar nege "ūsqynsyz" oıynshyqtarǵa qūmar? Mūndaı oıynshyq balanyń psıhologıyasyna kerí áser ete me? Aqshamnews.kz tílshísí zerttep kórdí.
"Anashym, labubu alyp bershí"
Būl ótínísh sízge de tanys bolar. Búkíl bala talasa sūrap júrgen oıynshyq keıíngí uaqytta paıda bolǵan sekíldí kóríngenímen, būl keıípker alǵash ret 2015 jyly gonkongtík ıllyustratordyń qıyalynan tuǵan. Labubudyń eń qatty tanymal bolǵan sátí K-pop toby Blackpink memberí Lısanyń sómkesínen kóríngennen keıín bastaldy. Artynsha būl trendtí Kım Kardashyan men Rıanna da jalǵastyrdy.
Osydan keıín Labubu beınelengen oıynshyqtar men zattarǵa sūranys kúrt artty: resmı dúkenderdíń aldynda ūzyn-sonar kezek paıda bolyp, oıynshyqtyń baǵalary sharyqtap kettí. Al qazír TikTok pen YouTube-ta Labubudy su jańa kúıínde ashyp jatqan vıdeolar mıllıondaǵan qaralym jınap, ony odan saıyn vırustyq trendke aınaldyrdy.
suret: depositphotos.com
4 myńnan - 190 myńǵa deıín
Naryqta būl oıynshyqtyń baǵasy túpnūsqasyna jáne jasandylaryna qaraı túrlí baǵada satylyp jatyr. Jasandy túrlerí bazarlarda 2 myń - 5 myń kólemínde, al shetelden ákelíngen túpnūsqalary 60 myń -190 myń teńgege deıín ūsynylyp jatyr.
Yandekstíń málímetínshe, mamyr aıynda "Labubu" kílt sózímen sūraular sany mıllıonnan asqan. Al mausym aıynyń basyna qaraı "qūbyjyq-oıynshyq" turaly aqparat kúníne 100 myńnan astam ret sūralǵan.
Labubu tabysynyń tarıhy - Poppy Playtime oıynynyń keıípkerí Haggı Vaggıdíń trendke aınalǵanyn eske salady. Alǵashynda ol balalar men kollektsıonerlerdíń qalauynyń obektísíne aınalyp, keıín ata-analardyń, psıhologtardyń jáne qūqyq qorǵau organdarynyń nazaryn audarǵan edí.
suret: depositphotos.com
"Labubu" balalar úshín qauíptí me?
Psıholog, geshtalt-terapevt Ūlmeken Sándíbekqyzynyń aıtuynsha, Labubu alǵash kórgende eresekter úshín jaǵymsyz áser qaldyruy múmkín. Bíraq būl sezímdí balaǵa artuǵa bolmaıdy.
“Bízge ūsqynsyz kóríngenímen, balalar úshín ol múldem olaı emes. Kóbínde ertegí, multfılm keıípkerlerí de qorqynyshty, bíraq meıírímdí bolyp keledí. Qūbyjyq pen hanshaıym turaly ertegílerdegí sıyaqty – syrt kelbetí emes, íshkí mání mańyzdy”, – deıdí maman.
Oıynshyqtyń tanymaldyǵy balalardyń bír-bírímen básekelestígí men erekshelenuge degen ūmtylysymen de baılanysty boluy múmkín.
“Mássaǵan, sende Labubu bar eken!” – degen tańdanys arqyly bala ózíne nazar audartqysy keledí. Būl oıynshyqtyń emotsıyaǵa toly bírneshe túrí bar, sonyń arqasynda bala óz kóńíl kúıín de bíldíríp jatqan boluy múmkín”, – deıdí psıholog.
suret: depositphotos.com
Psıhologtan ata-analarǵa keńes
Qorqynyshty oıynshyqtarmen oınau asa bír alańdata qoımaıtyn dúnıe sekíldí kóríngenímen balanyń psıhologıyasyna únsíz sıgnal beríp jatuy múmkín.
“Bírden baıqalmaǵanymen qorqynyshty oıynshyqtar qobalju, qorqynysh, jaısyz túster men kúızelíske alyp keluí múmkín. Bala ózíníń sezímderín tolyq aıta almaǵandyqtan ártúrlí sımptomdar arqyly kórínís beredí. Meníń tájírıbemde áleumettík jelíden kórgen beıneden soń qatty qorqyp , díríldep kelgen, áldebír beınení kóríp, bír mezette qorqynyshtan kózín asha almaı qalǵan balalar boldy. Qorqynysh sezímderímen jūmys ístegen soń, qalypqa tústí”, – deıdí maman.
Balanyń “Labubu” sıyaqty oıynshyqqa áuestenuí – keıde ata-anadan kórgen qysymnyń saldary boluy múmkín.
“Ata-ana balasynyń qylyǵyn emes, tūlǵasyn synaı berse, bala ózín "jaman", "súıkímsíz" sezíníp, sol beınege ūqsaǵysy keluí múmkín. Sondyqtan ata-analarǵa balanyń áreketín baǵalauǵa, al tūlǵasyna qūrmetpen qarauǵa keńes beremín. Sondaı-aq, balanyń qalauyn múlde tyımaı, bír oıynshyqqa shekten tys baılanyp ketuíne jol bermegen dūrys”, – deıdí psıholog.