Almaty ákimi Abaı atyndaǵy respýblıkalyq mektep-ınternatynyń qurylys barysyn tekserdi, - dep habarlaıdy Aqshamnews.kz.
Almaty ákimi Darhan Satybaldy Bostandyq aýdanynda boı kóterip jatqan Abaı atyndaǵy daryndy balalarǵa arnalǵan respýblıkalyq mamandandyrylǵan mektep-ınternattyń qurylys alańyna jumys saparymen bardy.
Bul bilim ordasynyń salynýy bilim berý júıesin damytýǵa qosylǵan qomaqty úles bolmaq.
Merdiger kompanıalardyń málimetine sáıkes, qurylys jumystary bekitilgen kestege saı júrip jatyr, mejeli merzimnen keshikpeıdi. Negizgi tirek bolatyn monolıtti qurylym jedeldetilgen qarqynmen quıylyp, 10 mamyrǵa deıin tolyq aıaqtalǵan.
Joba aıasynda 900 orynǵa arnalǵan shyǵarmashylyq mektebi men ınternat, aýmaqty kórkeıtý men kógaldandyrý, amfıteatrdy qaıta jańǵyrtý, ınjenerlik jelilerdi tartý jáne avtomatty sýarý júıesin ornatý kózdelgen.
Qurylys jumystarynyń sońǵy kezeńinde demeýshilerdiń qarjysy esebinen zamanaýı dene shynyqtyrý-saýyqtyrý kesheni boı kóteredi. Oǵan baseın, kúres jáne boks zaldary, sondaı-aq daıyndyq sabaqtaryna arnalǵan jattyǵý zaly kiredi.
Qurylys-montaj jumystary 2025 jyldyń tamyz aıynda aıaqtalady dep josparlanyp otyr.