Qazaqstandyqtardyń 57,8%-y 2024 jyldyń 6 qazanynda ótetin referendýmǵa qatysýdy josparlap otyr, al 59,3%-y AES qurylysyna qoldaý bildirdi. Bul málimetter Qoǵamdyq saıasat ınstıtýty júrgizgen áleýmettanýlyq zertteý nátıjelerinde usynyldy.
Qoǵamdyq saıasat ınstıtýty Qazaqstanda 2024 jyly ótetin atom elektr stansıasyn salý jónindegi referendýmǵa turǵyndardyń kózqarasyn anyqtaý maqsatynda ekspress-saýalnama ótkizdi. Zertteýge eldiń ár aımaǵynan 2000-nan astam turǵyn qatysty. Olardyń qatarynda jastar, zeınetkerler, kópbalaly otbasylar jáne túrli áleýmettik top ókilderi boldy.
Instıtýt dırektory Madına Nurǵalıevanyń aıtýynsha, respondentterdiń 74,6%-y referendým týraly habardar ekendigin bildirgen. Olardyń 57,8%-y referendýmǵa qatysýdy josparlap otyr. Sonymen qatar, 59,3%-y Qazaqstanda atom elektr stansıasyn salýǵa qoldaý kórsetip, oń pikir bildirgen.
«Zertteý nátıjeleri kórsetkendeı, halyqtyń basym bóligi aldaǵy referendým týraly biledi jáne oǵan belsendi qatysýdy josparlap otyr. Azamattardyń bul másele boıynsha joǵary deńgeıde habardar bolýy atom elektr stansıasy qurylysyna qatysty qoǵamnyń úlken qyzyǵýshylyq bildirip otyrǵanyn kórsetedi. Sheshim qabyldaý prosesinde halyqtyń árbir pikiri eskerilip, ashyqtyqty qamtamasyz etý mańyzdy,» – dep atap ótti Nurǵalıeva.
Saýalnama barysynda «face-to-face» ádisi qoldanyldy. Qoǵamdyq saıasat ınstıtýtynyń bas sarapshysy Medet Ómirzaqov bul ádis derekterdi jınaýdyń eń dál tásilderiniń biri ekenin atap ótti. Saýalnama qaǵazsyz, avtomattandyrylǵan túrde júrgizilip, árbir suhbattyń uzaqtyǵy, respondenttiń reaksıasy jáne GPS-koordınattary tirkelip otyrdy. Bul derekterdiń sapasyn arttyryp, saýalnamanyń dáldigin baqylaýǵa kómektesti.
Qoǵamdyq saıasat ınstıtýtynyń sarapshylary mundaı áleýmettik zertteýler qazaqstandyqtardyń máseleni tereńirek túsinip, negizdelgen sheshim qabyldaýyna kómektesetinin atap ótti. Saýalnama QR zańnamasyna sáıkes ótkizildi.